الجنيه راجع بقوة والدولار يتراجع 12%.. يا ترى إيه اللي حصل ؟
لأول مرة يمكن من بعد الحرب الروسية الأوكرانية الدولار يتراجع بالشكل ده في السوق السودا للعملة والجنيه استرد جزء كبير من قوته قدام العملة الأمريكية.. وبعد ما المؤشرات والتقارير الدولية كانت بتقول ان فيه تخفيض قريب في قيمة العملة المحلية الأوضاع اختلفت تماما والمضاربين في السوق الموازية بيتكبدوا خساير غير مسبوقة .. فيا ترى ايه اللى حصل ؟ وهل تراجع الدولار هيستمر ولا لأ؟ وايه المتغيرات اللى حصلت خلت الدنيا تتقلب 180 درجة كده؟
في الكام يوم الأخيرة الجنيه بدأ يسترد عافيته بقوة والدولار بعيدا عن البنوك انخفض سعره بنسبة 12٪ في السوق السودا خلال الأسبوع اللى مع تراجع الطلب على العملة الأمريكية.. وعلى فكرة ده مش كلامنا ولا كلام مسئولين بيجاولوا يهدوا الدنيا ده كلام وكالة وكالة بلومبرج واحدة من أكبر الوكالات الدولية..
انهيار الدولار في السوق السودا بيأتي بالتزامن مع قرار البنك المركزي بشأن تسعير الفائدة، والى أبقى على سعر الفائدة عند 18.25%، في تالت اجتماعات لجنة السياسة النقدية خلال 2023.
ووفقا لمتعاملين في السوق السودا للدولار تم تداول العملة الأمريكية عند حوالي 37 جنيه للدولار في آخر تعاملات مقارنة بـ 42 كان بيباع بيها الأسبوع اللي فات وسط توقعات بمزيد من الهبوط في سعر الدولار الفترة الجاية كمان.
وتراجع الطلب على الدولار بشكل مفاجئ وده خلا المضاربين يقللوا نشاطهم خصوصا وان سعر الدولار في البنوك بيتم تداوله عند مستوى 31 جنيه.
طب ايه اللى خلا دولار السوق السودا ينهار؟
فيه اكتر من حاجة ساهمت في انهيار الدولار في السوق السودا أولها كان تصريح رسمي صدر لأول مرة من رئيس الحكومة الدكتور مصطفى مدبولى اكد فيه ان الجنيه المصري مقيم بأقل من سعره بكتير وقال ان الحكومة شغالة على خطة لحل أزمة نقص العملة الأجنبية بتتضمن طرح عدد من الشركات المملوكة للدولة في البورصة وكمان جذب استثمارات أجنبية مباشرة قبل نهاية 2023.
كمان كان فيه مبادرة من تجار السيارات بوقف شراء العملة الخضراء من السوق السودا ووقف المضاربة عليه خلال الفترة الجاية بالإضافة كمان لقرار الحكومة بالموافقة على دخول الدهب من الخارج دون مصنعية أو ضرايب وده خلال المضاربة على الدولار تقل ومعاها انخفضت الأسعار بالشكل الملحوظ ده.
