الدولار أعلى من قيمته بـ 20 %.. شركة أبحاث معروفة تكشف المستور
من بعد اندلاع الحرب الروسية الأوكرانية في فبراير 2022 ولحد دلوقتى أداء الدولار الأمريكي هو الأقوى عالميا قدام كل العملات.. وفي السنة اللى فاتت بس الدولار سحق كل العملات يورو واسترليني وين ويوان وروبل وبالبلدي كده ما سابش عملة الا وعلم عليها وده اللى خلا أصوات كتير تظهر بضرورة البحث عن بديل للعملة الأمريكية.. لكن رغم كده استمر الدولار في تحقيق نتائج إيجابية وكان كل يوم بيكسب أرض جديدة.. لكن في الساعات الأخيرة في شركة أبحاث معروفة طلعت بتقرير فجر مفاجأة من العيار التقيل وكشف المستور عن قوة العملة الأمريكية ومستقبل الصراع مع الدهب.
شركة الأبحاث العالمية المعروفة بي سي ايه نشرت النهاردة تقرير في منتهى الأهمية والخطورة عن القيم اللى بيتم تداول الدولار على أساسها وأعلنت ان الدولار بيتم تداوله بأعلى من قيمته الحقيقية بحوالي 20% ودي نسبة مش قليلة خالص .. والتقرير أتكلم عن الصراع المشتعل بين الدولار وبين الدهب وأكد ان الدهب المفروض الاونصة تتباع بحوالي 2200 دولار امريكي في حين ان سعرها الحالي في السوق دلوقتى حوالى 2016 دولار.
كبير محللي العملات الأجنبية في BCA Research، قال ان الدهب أحد أفضل أصول في عام 2023، وقال إن التوقعات الكلية وطلب المستثمرين يدعمان الأسعار المرتفعة.
وترى BCA أن الدهب هيقفز إلى مستوى 2200 دولار خلال الأشهر التسعة إلى 16 القادمة.
أبحاث شركة بي سي ايه قالت أن المحرك الأساسي للدهب هو الدولار الأمريكي، اللى كان ضعيف قبل الحرب الروسية الأوكرانية وطبعا قوته زادت بعد الحرب لكن قيمته مبالغ فيها بحوالي 20% ، وقللت أبحاث الشركة من محاولات إزالة الدولرة واعتماد عملة بديلة للدولار تقدر تطيح بيه على المدى القريب.
وكشفت الشركة تراجع كبير في الاعتماد على الدولار في الاحتياطات الدولية للبنوك المركزية وقالت ان نسبته في سنة 2000 كانت 70% وتراجعت حاليا الى 60% في حين ارتفعت حصة الدهب من 6٪ في 2015 إلى 10٪ حاليا .. لكنها أكدت ان إزالة الدولرة مش هتحصل قريب لأن بيانات صندوق النقد الدولي كشفت أن المعاملات بالدولار الأمريكي تزداد في جميع أنحاء العالم. "
الشركة ختمت تقريرها بانها تعتقد بان قضية سقف الديون ممكن ما تؤديش إلى انهيار الدولار ولكنها هتترك للدول التانية العديد من الأسئلة حول قوة العملة الأمريكية.
