خادم من المنوفية صورته انطبعت على الجنيه بدل الملك فؤاد.. يا ترى اية الحكاية

في 8 يوليو 1928.. الناس في مصر لاحظت وجود صورة خادم يدعى إدريس على الجنيه.

الناس طبعااا استغربت وقالت مين اللي صورته على الجنيه.. لأن العادة كانت بتقول إن الصورة اللي بتكون على الجنيه هي صورة الملك.

القصة كانت في عهد السلطان حسين .. وكان وقتها خادم إسمه إدريس بيعمل في القصر  الملكي.. وشاف رؤيا في منامه، بأن الأمير  أحمد فؤاد هايبقى حاكم مصر.

المهم الخادم خد بعضه وراح قال الكلام دا للأمير أحمد فؤاد.. وقال له إنه شاف رؤية فيها أنه هيبقى ملك  مصر.. المهم الأمير ابتسم  وقال له إنه من الصعب دا يحصل، لأن أخوه السلطان حسين ليه ولي عهد، وهو ابنه الأمير كمال الدين حسين، وهو اللي هايتولى السلطة بعد الملك فؤاد.. لكن لو حصل وتولى السلطة هايحط صورة إدريس الخادم  على الجنيه.

لكن الرؤية تحققت بالفعل .. ودا لما  تنازل الأمير كمال الدين حسين عن عرش مصر وتوفي السلطان والده، وفجأة لقى الأمير فؤاد نفسه سلطانا لمصر..  فذهب الأمير المتوج للقصر ولقى إدريس بيصلي فقعد جنبه لما خلص  صلاته، وقال له "اتحقق حلمك وأصبحت سلطانا على مصر، وستكون صورتك على أول جنيه تصدره حكومتي".

وفعلا الملك فؤاد الأول نفذ وعده وأصدر جنيه إدريس الفلاح في 8 يوليو 1928.