تجار الصاغة يسعرون الدولار بـ 40 جنيه.. لماذا ؟
يا ترى ايه اللى بيحصل فى سوق الدهب؟ وليه تجار الصاغة وأصحاب المحلات مسعرين الدولار على 40 جنيه ؟ وامتى هيتم طرح الدهب فى البورصة السلعية زي ما أعلنت وزارة التموين من فترة؟ وليه الحكومة سايبة اللي بيحصل فى السوق الدهب وما بتتحركش زي ما حصل قبل كده لوقف جنون الأسعار؟
بحسبة بسيطة للسعر العالمي للدهب حضرتك هتلاحظ ان الفرق بين سعر الدهب المحلى والسعر العالمي للدهب بقترب من 500 جنيه فى الجرام الواحد وتعالى نحسبها مع بعض كده :
أونصة الدهب سعرها عالميا النهاردة عامل 2006 دولار وزن الأونصة 31.1 جرام عيار 24، هنقسم السعر اللى هو 2006 دولار على عدد الجرامات 31.1، هتلاقي أن سعر الجرام عامل 64.5 دولار، اضرب الرقم ده في سعر الدولار في البنك المركزي المصري النهاردة اللى هو حوالى 30.93 جنيه
يعني 64.5 في 30.93 جنيه الناتج 1994 جنيه للجرام عيار 24.. واحد هيقولى إزاي وعيار 24 مصر بيتباع ب 2468 جنيه هنا بقا الحكاية والتلاعب اللى بيحصل فى السعر واللى جزء منه ليه علاقة بواردات الدهب من الخارج وببعض القرارات اللى حصلت مؤخرا وحجمت من المضاربة على الدولار.
طيب بالحسبة البسيطة اللى حسبناها من شوية هتلاقى ان سعر الدولار الأمريكي متسعر ب حوالى 40 جنيه يعنى فيه فرق سعر مع السوق الرسمي بأكتر من 9 جنيه في كل دولار .
طب إزاي ده بيحصل ؟
لازم نكون عارفين ان تجار الدهب هما أكتر ناس متورطين فى السوق السودا للدولار فى مصر لكن فيه كمان معايير تانية مخليا فيه فرق كبير بين السعر الرسمي للدولار وتسعيرته في بيع وشراء الدهب أولها ان الدهب سلعة عالمية وبتتحكم فيها معاييير داخلية ومعايير خارجية وعالميا السعر بيزيد كل شوية بسبب اللى بيحصل فى العالم واللى خلا الدهب هو الملاذ الآمن للأفراد والحكومات وده زود الاقبال على المعدن الصفر بصورة غير مسبوقة وحتى البنوك المركزية فى العالم كله بقت مهتمة مؤخرا بشرا الدهب وبرفع احتياطياتها من المعدن النفيس
نفس الكلام فى السوق مع استمرار ارتفاع التضخم الناس كلها بتروح للدهب علشان تحافظ على قيمة مدخراتهم وده خلا فيه زيادة على الطلب ونقص فى المعروض وألف باء اقتصاد طول ما الطلب على سلعة بيرتفع سعرها بيرتفع اتوماتيك
طب هل الحكومة ممكن تتدخل وتوقف اللى بيحصل؟
المفترض ان فيه تحركات قوية فى الاتجاه ده ووزير التموين كان اعلن من فترة ان الدهب هيطرح ضمن البورصة السلعية وان سعر الجرام هيحدد وفقا للسعر العالمي وربطا بسعر الدولار فى البنك المركزي والبنوك المصرية بس ده هيحصل امتى محدش عارف لحد دلوقتى.
