ازاي تحسب عائد شهادة الإدخار بشكل شهري أو سنوي بمثال بسيط؟

كل وقت والتاني بنسمع عن شهادات إدخار جديدة واللي بيكون العائد عليها كبير.. ودا علشان الناس تقدر تواجه التضخم وارتفاع الأسعار.. وأكيد ناس كتير من المتابعين اشتروا في وقت سابق شهادة ال ٢٢.٥٪ وشهادة ال ٢٥٪.. اللي تم طرحهم من البنك الأهلي وبنك مصر وبنك القاهرة.. واللي تم التوقف عن إصدارهم بالمناسبة.

بس دايما المشتري لشهادات الإدخار بيواجه مشكلة.. ألا وهي ازاي يحسب العائد على شهادة الإدخار اللي بالجنيه خاصة.

إحنا النهاردة هانضرب مثل ونقولك ازاي تحسب العائد ولو مثلا عن شهادة إدخار البنك الأهلي اللي بنسبة عائد تصل ل ١٦٪.

وخلينا مثلاً.. نقول إن معاك مبلغ قدره ١٠٠ ألف جنيه وأنت اشتريت بيه شهادة إدخار.. بالمبلغ كله يعني.. ازاي بقى وقتها تحسب العائد.

أنت هاتجيب قيمة المبلغ وهو 100ألف جنيه.. وتضربه في عائد الشهادة وهو 16.. وبعدين تقسم الناتج النهائي على 100.. ودا بقى هو قيمة الربح السنوية واللي هي 16000 ألف جنيه سنوياً.

طيب لو العائد شهري.. فأنت هاتعمل نفس الموضوع.. هاتضرب قيمة المبلغ وهو 100 ألف جنيه في عائد الشهادة وهو 16.. وبعدين تقسم الناتج النهائي على 100وبعدين تقسم الناتج على 12 وهو عدد أشهر السنة، علشان  المبلغ النهائي يصبح هو العائد الشهري، وهو 1333جنيه.. وتقدر تقيس أو تعمل الطريقة دي على أي شهادة إدخار تانية.