رسمياً.. الجنيه ينخفض في البنك المركزي.. الدولار يزحف نحو الـ 25

خفض البنك المركزي المصري سعر الجنيه بمقدار قرشين في تعاملات اليوم بالتزامن مع شلل تام في السوق السوداء وخمول في حركة الموازية.

وارتفع الدولار مقابل الجنيه قرشين حسب المركزي، ليترفع من 24.7656 جنيه للبيع إلى 24.7856 جنيه للبيع، أما سعر الشراء فارتفع من 24.68 في تداولات أمس إلى 24.70 في شاشة سعر المركزي.

واستقر سعر الجنيه عند 24.76 منذ 19 ديسمبر قبل أن يتغير اليوم.

يا ترى أزمة العملة اللى بتعاني منها مصر ممكن تخلص بعد قرارات البنك المركزي الأخيرة؟ وهل الدولار سعره هينزل فعلا زي ما تقارير كتير بتقول؟ والسوق السودا للدولار هتختفي فعلا ولا ممكن تكمل معانا فى 2023؟ وايه الحلول اللي البنك المركزي بيفكر فيها لحل كل الأزمات دي الفترة الجاية؟ وهل تدفق العوائد الدولارية ممكن يرجع للجنيه المصري هيبته ولا هيفضل يتراجع بشكل مستمر؟ 
 

هبدات اقتصادية

أسهل حاجة فى مصر انك تقول كلام مرسل وتضرب اشاعة وتقول اى كلام وللأسف ناس كتير بتصدق وتمشي ورا الهبد ده من غير ما تفكر، وده اللى كان بيحصل فى السوق السودا للدولار الفترة اللي فاتت فجأة الدولار ب 32 لا ب 34 لا ب38 .. لا ده الدولار هيعدي الـ 40 ويعنى ناس كتير ما بتفهمش فى الاقتصاد ولا فى قواعد الاقتصاد بتسمع الكلام ده وتطلع جري تشترى دولارات وتخزنها على أمل انها ترفع بالارقام اللى سمعتها دي.. وما يعرفوش ان دي مضاربات بيروج ليه المضاربين وتجار العملة اللي كل اللي يهمهم المكاسب اللى بيحققوها حتى لو كان ده على حساب اقتصاد البلد وعلى حساب عملتها الوطنية اللي بتواجه واحدة من أصعب المعارك في تاريخها. 

السعر العادل للدولار في مصر 

لكن لو جينا نتكلم علمي وكلام بتاع ناس بتفهم اقتصاد هنلاقي ان فيه مؤسسات دولية كبيرة كانت طلعت من أكتر من اسبوع وأكدت ان اللي بيحصل فى السوق الموازية للعملة جنان وكلام مالوش اى علاقة بالواقع .. وكان من المؤسسات دي جولدن مان ساكس اللي أكدت ان الجنيه المصري بيتداول بأقل من قيمته الحقيقية، وحذرت وقتها من ان الحالة دي مش هتستمر كتير وتوقعت ان الجنيه يتعافى وجنون الدولار يتوقف مع بداية قدوم العوائد الدولارية

جولدن مان ساكس اتكلمت بشكل واضح عن سبب الزمة وقالت ان الفرق بين السعر الرسمي للدولار 24 جنيه و70 قرش والسعر الموازي اللى وصل ل 38 جنيه فى بعض الأحيان سببه نقص سيولة العملات الأجنبية، خصوصا مع ضعف ميزان المدفوعات بسبب الحرب الروسية الأوكرانية اللي استنفذت سيولة العملات الأحنبية، مع تراجع التدفقات، وتقييد الوصول لسوق العملات.

إجراءات لمواجهة السوق السوداء

تقرير جولدن مان ساكس عن سعر الصرف توقع ان مصر هتاخد إجراءات حاسمة لمواجهة السوق السوداء، وفعلا بدأنا نشوف قرارات من البنك المركزي في سوق الدهب وفى عمليات السحب من الخارج وغيرها من اجراءات هيكون ليها مردود ايجاب جدا الأيام الجاية
طب ايه الاجراءات التانية اللي خدها البنك المركزي ممكن تساهم فى حل أزمة العملة؟ 
واحد من أهم القرارات هو قرار رفع اسعار الفايدة بحوالى 3% مرة واحدة رغم انا ناس كتير شايفها عالية اوي لكن قرار زي ده هيقوي موقف الجنيه المصري وهيساهم بقوة فى عودة الأموال الساخنة اللى هربت من مصر أو جزء كبير منها على أقل تقدير وصناديق الاستثمار الجنية هتفكر انها ترجع مصر تانى وتستفيد من سعر الفايد المرتفع ده خصوصا وان فيه اخبار قوية عن طرح شهادات بفايدة 20% أو أكتر وده معدل ربح مرتفع جدا مش هتلاقيه فى أى حتة تانية .

عودة الأموال الساخنة

وطبعا عودة ولو جزء من الأموال الساخنة هيضمن تدفقات نقدية من العملة الأجنبية هتساهم فى زيادة الاحتياطي النقدي وفى ارتافع حجم المعروض من الدولار وكل ده هيؤدي فى النهاية ان سعر العملة المريكية هيستقر وبعدين هيبدأ يتراجع وده حصل بالمناسبة فى 2016 فى التعويم الأول لما الدولار وصل ل 19 و70 قرش وبعدين نزل لحوالى 15 جنيه و70 قرش واستمر على الحال ده لفترة وصلت ل 5 سنين لغاية ما اندلعت الحرب الروسية الاوكرانية وحصل اللى حصل بعدها من تداعيات على السواق.

نمو عوائد مصر من الدولار

ووفقا لمصادرنا في بانكير الفترة الجاية هتشهد نمو فى عوائد مصر من الدولار مع بدء وصول الدفعة الأولى لقرض صندوق النقد وهيصاحب وصول التدفقات دي ارجاءات حاسمة من البنك المركزي هتؤدي الى انهيار السوق السودا للدولار، وهيكون فيه رقابة شديدة على اى عملية بيع عملة خارج السوق الرسمية فى البنوك وشركات الصرافة واى خروج عن النص هيواجه بمنتهى الحزم 
ومصر متوقع انها تستقبل ما يقرب من 15 مليار دولار فى الربع الأول من 2023 ودي الأموال اللي كان اشار ليها بيان صندوق النقد الدولي يوم 16 ديسمبر بعد الموافقة على قرض ال 3 مليار والفلوس دي هتلعب دور مهم وقوي فى الضرب بيد من حديد على تجار العملة وهتساهم فى توفير العملة الأمريكية وهينتهي العجز والأزمة هتخلص على خير ان شاء الله .

مؤشر الجنيه المصري

ومش لازم ننسى كمان ان البنك المركزي شغال دلوقتي على مؤشر الجنيه قدام عدد كبير من العملات الأجنبية التانية غير الدولار وده هيخلي الحكومة عندها خيارات تانية للاستيراد غير الدولار.
وكمان رئيس الوزراء كان أعلن من كام يوم عن تدبير مصادر نقد اجنبي مختلفة على منتصف ٢٠٢٣.

يعنى لو معايا دولار ابيع دلوقتى ولا استنى شوية؟ 
 

مش دوري اقولك بيع او اشترى دورنا نشرحلك الوضع فى السوق عامل ازاى وايه اللى بيحصل فى الكواليس .. لكن المؤكد ان الجنيه المصري وضعه هيتحسن كتير فى 2023 وده هينعكس على قوته قدام الدولار ومؤكد لما ده هيحصل الدولار سعره مش هيزيد حتى لو مش هيقل وفكرة ان يكون فيه سوق سودا تانى الدولة مش هتسمح بيها لأن ده خطر على الاقتصاد الوطنى وشفنا ازاى تجار العملة خلوا فيه مضاربات على سعر الدولار وكانوا بيرفعوا السعر بشكل خرافي وناس كتير ضاع شقا عمرهم لما مشيوا وراهم واشتروا الدولار ب 38 جنيه وكانوا مستنين البنك المركزي يحرك سعر الصرف لكن المركزي وجه ليهم ضربة قاصمة والسوق السودا انهارت والدولار نزل ل 26 و27 وفى الايام الجاى هيتوازى مع السعر الرسمي