الدولار لن يتوقف عن الزحف.. إليك السعر العادل للدولار أمام الجنيه المصري
هو السعر العادل للجنيه في مصر دلوقتى كام؟ واعلى سعر ممكن يوصلوا الدولار كام الفترة الجاية؟ وامتى الأسعار ممكن تنزل في مصر ؟ وهل ممكن البنك المركزي يتدخل في تحديد سعر الدولار مرة تانية؟ وايه علاقة كل ده بمعدلات التضخم اللى كل شوية بتزيد ومحدش عارف ممكن تقف امتى؟
الجنيه المصري بيواجه ضغوط كبيرة الفترة اللى فاتت انعكست على سعره قدام الدولار بعد قرار البنك المركزي باعتماد سعر صرف مرن للعملة المحلية قدام العملات الأجنبية ومن بداية 2022 ولحد دلوقتي الجنيه تراجع بأكتر من 50 % من قيمته بسبب تداعيات الحرب الروسية الأوكرانية والحكومة اضطرت لأول مرة في التاريخ تقريبا انها تعوم الجنيه مرتين في السنة لغاية ما وصل سعر الدولار الى 24.39 جنيه.
بس يا ترى هل ده السعر العادل للجنيه قدام الدولار؟
زي ما كلنا عارفين فالتجار والمستوردين وكل الناس اللى شغالة في السوق كانوا مسعرين الدولار بحوالي 23 ونص قبل التعويم الأخير ولأن فيه أزمة في توفير الدولار أصلا فسعر العملة الأمريكية مواصل ارتفاعاته والتوقعات بتقول ان سعر الدولار هيقف لما يوصل 25 جنيه ممكن يزيد أو يق حاجات بسيطة لكن هيفضل مستقر شوية عند السعر ده وممكن لغاية النص الأول من 2023 طالما الأحوال الاقتصادية اللى عايشينها مستمرة وطالما مفيش عوائد دولارية بتدخل البلد زيادة عن العوائد الطبيعية اللى بتتمثل في إيرادات قناة السويس وتحويلات المصريين في الخارج والسياحة ومؤخرا الصادرات المصرية للخارج واللى الحكومة أعلنت عن خطة لوصولها الى 100 مليار دولار في السنة.
طب امتى الأسعار في مصر ممكن تنزل؟
الحكومة جاليا شغالة على خطة للنزول بمعدلات التضخم وبتستهدف أسعار السلع الأساسية اللى بيعتمد عليها المصريين في حياتهم اليومية وممكن الخطة دي تبدأ تسمع مع نهاية الربع الول من السنة الجاية مش قبل كده وده مرتبط برضوا بالاحداث العالمية وبالحرب الروسية الأوكرانية واللى بيحصل في الأسواق العالمية.
وهل ممكن البنك المركزي يتدخل في تحديد سعر الدولار مرة تانية؟
بنسبة كبيرة البنك المركزي صعب جدا يتدخل مرة تانية في أسعار صرف الجنيه مقابل العملات التانية خصوصا ان ده كان شرط من شروط صندوق النقد الدولى عشان يوافق على اقراض مصر والبنك المركزي اعلن انه هيسيب الجنيه لقوانين العرض والطلب هي اللى تحدد السعر العادل للجنيه.
