ماهي فوائد اعتماد سعر صرف مرن للجنيه؟
ناس كتير شايفة قرار البنك المركزي باعتماد سعر صرف مرن للجنيه امام العملات التانية بنظرة تشاؤمية وشايفين ان الاوضاع هتزيد صعوبة والاسعار هتولع ومش شايفين فيه أى حاجة ايجابية خالص للبلد
خونا فى الاول نقولكم ايه اللى حصل النهاردة؟
البنك المركزي أعلن إطلاق سعر صرف الجنيه أمام الدولار يعنى سعر الدولار هيتحدد حسب العرض والطلب .. وكمان تم رفع اسعار الفايدة على الودائع والقروض بنسبة ٢٪ و إلغاء القرارات اللي صدرت والخاصة بالإعتمادات المستندية للإستيراد بنهاية السنة دي
طيب ده حلو ولا وحش؟
مفيش قرار حلو على طول الخط ولا وحش على طول الخط بس القرارات بتاعت النهاردة فيها حاجات كتير ايجابية زي ايه
زي الحصول على قرض الصندوق وقروض أخرى من دول مانحة تصل ل ٩ مليار دولار و توفير الدولار في الأسواق وإطلاق الحرية في التعامل بيه للمستوردين والمتعاملين مع الخارج وكمان تشجيع المستثمرين لدخول السوق المصري بقوة بسبب توحيد سعر الدولار وإمكانية تحويله للخارج بدون معوقات .. وطبعا أعداد السائحين هتزيد بسبب إنخفاض الجنيه المصري فبالنسبة لهم مصر بلد أسعارها رخيصة جدا وهيتشجعوا أكتر للحضور ويمكن شراء عقارات كمان
والأهم تحويلات المصريين في الخارج هتزيد لأن العشر الاف ريال أو درهم اللي كان المغترب بيحولهم زادت قيمتهم جدا وسعرهم فى البنك بقا زي سعرهم بره لأن خلاص مفيش سوق سودا تاني.. كمان إيراد قناة السويس هتعمل مبلغ أكثر يمكن تحويل جزء منه بالجنيه عشان نعجز الموازنة الداخلية
والمفروض تحصل زيادة في التصدير لأن السلعة المصرية قيمتها بالدولار نقصت
طب ليه الدولة قررت تبني سعر صرف مرن ؟
اكبر المستفيدين من تدخل الدولة في الحفاظ على سعر الدولار مقابل الجنيه كان الأغنياء فقط ودول الناس اللى بتسافر بره كتير بغرض السياحة والترفيه والشوبينج وكانوا بيحتاجوا دولارات كتيرة بسعر جنيه منخفض وكانهم بياخدوا دعم على الدولارات اللى بيتفسحوا بيها وبيشتروا بيها اكل للقطط والكلاب
لكن اعتماد سعر صرف مرن يعتبر انحياز للفقراء والفلوس اللى الدولة كانت بتضخها عشان تحافظ على قيمة الجنيه هتوجهها مباشرة لدعم الفئات المستحقة للدعم والأسواق هتتفتح والاستيراد هيرجع تانى وده طبعا غير دخول الاستثمارات المباشرة اللى هيتم من خلالها فتح مشروعات جديدة هتشغل مئات الالاف من المصريين.
والقرار زي ما قولنا لحضراتكم هيساعد بشكل كبير على تدفق السياحة وزيادتها الفترة اللى جاية وعلى سبيل المثال .. دولة زي المجر عملتها ضعيفة جدا مقابل الدولار لانه واصل لأكثر من 300 فورنت مجري وعلشان كده كل المواطنين حول العالم بيتجهوا للسياحة هناك وده مخليها بس متأثرة بفرق السعر نهائي .. لكن الاقتصاد بتاع المجر بيكبر وبينمو بشكل ملحوظ وخلها الدولار دايما فى زيادة
المحصلة النهائية ان قرار تعويم الجنيه النهاردة قرار صائب ويمكن كمان اتأخر كتير أوي لأن الدولة حاليا مش بتستهدف سعر صرف ثابت ولكن اقتصاد قوي والقرار هيساهم فى زيادة الاستثمارات والتشغيل
طب هل الكلام ده معناه ان الدولار هيفضل يزيد بالشكل ده ؟
لا طبعا الدولار هيوصل لأعلى نقطة ليه واللى بيتوقع الخبراء انها تكون ما بين 24 و25 جنيه وبعدها هيبدأ فى التراجع وده نفس السيناريو اللى حصل بعد قرار التعويم فى 2016 لما الدولار وصل سعره لأكتر من 19 جنيه ونص وبعدين رجع تانى عند مستويات 15 جنيه و60 قرش
ده ممكن يحصل امتى؟ أغلب الظن ده مش هيكون قبل سنة كاملة تكون نتائج القرارات اتحققت زالمعروض من العملة الأجنبية زاد عن الطلب.
