فلوسك في خطر..هاكر جديد يرسل عشرات الآلاف من الرسائل لعملاء البنك الاهلي المصري

لو جاتلك رسالة من البنك الأهلي بشعاره الأخضر على أي شات فيس أو واتس أوعى تفتح اللينك.. لأنك لو فتحته يبقي كده خلاص كل بياناتك اتسرقت وحسابات الالكترونية اتهكرت.. وكمان حساباتك في البنوك ممكن تكون في خطر وفلوسك بتتحول وانت قاعد في مكانك.. لكن إيه الحكاية وليه الرسالة دي سببت الرعب في الكام اللي فاتوا تعالى نقولك.

من كام يوم ولسه مستمرة فوجيء عدد كبير من المواطنين باستقبال رسالة عبارة عن لينك عليه شعار البنك الأهلي المصري.. وللأسف ناس كتير فتحت الرسالة حتى اللي ملهوش حساب في البنك وبعدها كل حاجة راحت واتعرضت حساباتك وبياناتك للهكر على يد محترفين.
للأسف ناس كتير وقعت في الفخ وراحت بياناتهم وفيه ناس تانية لحقت نفسها بعد ماخرجت تحذيرات على السوشيال ميديا بتحذر من الرسالة القاتلة، من ناحيته البنك الأهلي سبق وحذر كتير من استقبال أي رسائل أو حتى اتصالات من اشخاص يدعون إنهم تبع البنك وأكد إن أي اتصال مع العميل بيكون من خلال الفروع أو على اتصالات مضمونة.. والبنك نفى مسئوليته عن أي هاكر استخدم اسمه في سرقة بيانات المواطنين.

وحذر البنك الأهلي من صفحات مزورة بتنتحل صفته على مواقع التواصل الاجتماعي، وأكد إن كل حساباته موثقة بالعلامة الزرقاء، وأنه طور أساليبه التقنية لحماية بيانات العملاء الشخصية، مطالباً أصحاب البطاقات الائتمانية بالاتصال فوراً بخدمة العملاء فور فقدانها على رقم 19623، أو إيقافها عبر تطبيق «الأهلي نت» أو «الأهلي موبايل».

لكن تعمل ايه لو حساباتك اتعرضت للهاكر والسرقة.. أول حاجة بتقفل كل حساباتك البنكية وبتبلغ البنك بسرقة البيانات بتروح لأي فني متخصص عشان يحاول يستعيد بياناتك ويأمنها بشكل كبير.