الطريق العشرة للتخلص من ديونك
الديون مشكلة كبيرة يقع فيها الكثير من الناس ويكون محبطا مما يؤثر فى القرارات المالية لدي الكثيرين ويضعهم فى ما يشبة بالورطة لكن كل دة ليس لة اساس حيث يمكن معالجة مشكلة الديون بسهولة ويسر اذا ما اتبعت بعض النصائح الهامة التى تساعدك فى التخلص من ديونك فى اسرع وقت ممكن .
ونعرض فى التقرير التالي لكم 10 نصائح ممكن تساعدك فى التخلص من الديون فى أسرع وقت وبدون ان تضعك فى ورطة او مشاكل مالية متراكمة .
1. استخدم نقط المكافآت في التسديد
بدل ما تصرف النقط اللي بتلمها على استخدام الكريدت كارد، أحسنلك تستخدم النقط دي في تسديد ديونك، ولو النقط دي في بنك تاني، حولهم لكاش باك واستخدم الكاش في تسديد الديون في البنك التاني.
2. استخدم تحويل الرصيد
في بنوك بتسمحلك إنك تحول رصيد كروتك التانية اللي لسة بتسدده عليها، ودي حاجة مفيدة لو نسبة الفايدة أقل، وفي بعض الأحيان البنك ممكن يعملك تخفيض للفايدة لمدة معينة للسداد.
3. سدد على قد ما تقدر
لو لقيت إنك ممكن تسدد أكتر من أقل مبلغ ممكن تسديده، اعمل كدة، لإن ده هيساعدك توفر في الفايدة اللي هتدفعها الشهر اللي بعده.
4. رتب الديون
رتب الديون على حسب المبلغ، وادفع الديون الصغيرة الأول، خصوصاً لو ممكن تدفعها بالكامل، مع دفع أقل مبلغ ممكن في الديون التانية.
5. بطل تستخدم الكريدت كارد كطريقة تمويل
لو أنت مديون، يبقى أفضل حاجة ممكن تعملها هو إنك ما تزودش الدين اللي عليك، وأسهل طريقة هي إنك تبطل تستخدم الكريدت كارد كطريقة لتأجيل الدفع.
6. حدد ميزانية لنفسك
ممكن النقطة دي تبقى أهم حاجة تعملها، بس الأهم من كدة إنك تلتزم بالميزانية، وما تزودش في المصروفات، وأي حاجة تحوشها، تروح لتسديد الديون.
7. اشتغل وقت إضافي
في شركات كتير بتدفع زيادة للموظفين اللي بيشتغلوا إضافي، لو شركتك منهم وبيطلبوا منك تشتغل وقت إضافي، دي هتبقى فكرة كويسة لزيادة دخلك.
8. اشتغل في وقت فراغك
استخدم أي وقت متاح عندك إنك تشتغل شغلانة تانية، ممكن من البيت أو أونلاين، واستخدم الفلوس الزيادة في تسديد ديونك.
9. استخدم الفايدة على حساب التوفير
أكيد عندك حساب توفير للطوارئ، خد الفايدة اللي بتنزل على حسابك كل شهر، وسدد بيها ديونك، بكدة مش هتروح جنب الفلوس اللي محوشها للطوارئ، بس في نفس الوقت هتساعدك في الوصول لأهدافك المالية بسرعة.
10. استغني عن أي هواية مكلفة
أي حاجة أنت مش محتاجها وبتكلفك فلوس، حاول تستغني عنها، سواي أكل برة أو شرب سجاير أو سفر مالوش لازمة، حط الأولوية دايماً لتسديد الديون، واوعد نفسك إنك تحتفل أول ما تسدد ديونك بالطريقة اللي تناسبك.
