ببساطة.. يعني ايه اعتماد مستندي وايه أنواعه؟.. وازاي البلد هتستفيد منه ؟

منذ اعلان البنك المركزي قراره بوقف التعامل بمستندات التحصيل فى العمليات الاستيرادية والاعتماد على الاعتماد المستندية بدءا من شهر مارس، وهناك اهتمام كبير من جانب القراء على البحث عن ما هي الاعتمادات المستندية وما هي أنواعها وكيف تستفيد منها الدولة؟.  وفى السطور التالية يقدم "بانكير" شرح وافي ومبسط للاعتمادات المستندية:  الاعتماد المستندى هو تعهد صادر من البنك فاتح الاعتماد (بنك المستورد) يتعهد فيه البنك بدفع مبلغ أو تفويض بنك آخر (بنك المصدر) بدفع مبلغ لصالح المستفيد (المصدر) مقابل استلام مستندات مطابقة لشروط الاعتماد ( اللى هى مستندات الشحنة من بوليصة وفاتورة ..الخ )

والاعتماد بينقسم لعدة أنواع طبقا لقوته ولطريقة الدفع وهنتطرق ليها فيما بعد  ازاى بيتم فتح الاعتماد وايه مشكلته ؟ بيسبق فتح الاعتماد مراسلات طبعا بين المصدر والمستورد على القيمة والشحن وخلافه وبيتفقوا ان الدفع هيكون عن طريق اعتماد مستندى وبعدها المصدر بيبعت proforma  المستورد بيتقدم للبنك بتاعه بالproforma ومعاها طلب فتح اعتماد وهنا بقى المشكلة   هنفترض مثلا انك كمستورد اتفقت مع المصدر على شحنة والسداد مثلا بعد ٦٠ يوم من تاريخ الشحن  اولا : لازم يكون المستورد له ائتمان فى البنك ، لأن البنك بيكون ضامن ليك فى السداد لو انت مقدرتش تسد وطبعا الائتمان مبيتاخدش من البنك بالساهل ... لازم يكون البنك عنده الضمانات الكافية ومطلع على حساباتك وأرباحك وموقف شركتك المالى عشان يبدأ يديك ائتمان  ثانيا : لازم يكون طلب فتح الاعتماد متوافق مع الاعراف والقواعد الدولية وطبعا مش كل المستوردين على دراية بيها ثالثا : طرق الدفع الاخرى فى التجارة الخارجية مصاريفها البنكية اقل بكتير من طريقة الدفع بالاعتماد المستندى  الاعتماد مصاريفه كتير زى مصروفات فتح ومصروفات تعديل الاعتماد لو حبيت تعدل ومصروفات تعزيز ومصروفات بريد ومصروفات البنك المراسل (بنك المصدر) ومصروفات سويفت .. الخ الخ  ، يعنى تكاليف زيادة عالمستورد .

نيجى بقى لأنواع الاعتماد من حيث قوته من جانب المستورد والمصدر

فى حاجة اسمها اعتماد قابل للإلغاء وده اعتماد تقدر تلغيه كمستورد مع البنك بتاعك فى اى وقت و ده طبعا محدش من المصدرين بيقبله لأنك ممكن تفركش الليلة فى اى وقت براحتك 

فى نوع تانى غير قابل للإلغاء الا بإتفاق جميع الأطراف (المستورد وبنكه والمصدر وبنكه) و ده اللى غالبا بيستخدم لأنه ضمان للمصدر انه ياخد فلوسه لو المستندات مطابقة لشروط الاعتماد 

فى نوع اسمه الاعتماد غير المعزز و ده بيكون البنك بتاعك كمستورد هو اللى ضامن لوحده فلوس المصدر وبيكتفى بنك المصدر انه يكون بنك مراسل فقط 

فى نوع تانى اسمه الاعتماد المعزز و ده بيكون بنك المستورد وبنك المصدر ضامنين فلوس المصدر  وغالبا المصدر هو اللى بيطلب التعزيز ده من المستورد وطبعا لازم يكون البنك اللى انت بتتعامل معاه فى مصر من بنوك الدرجة الاولى وبنك ثقة عشان البنك الأجنبى يقبل ان يضمن معاه 

نيجى بقى لأنواع الاعتماد طبقا لطريقة الدفع 

فى نوع اسمه الاعتماد بالاطلاع ، يعنى بمجرد ما البنك بتاعك يطلع على المستندات ويلاقيها مطابقة لشروط الاعتماد بيحول الفلوس علطول 

فى نوع تانى اسمه اعتماد القبول وهنا بيكون الدفع فى وقت لاحق متفق عليه فى شروط الاعتماد وبتقدم انت كمستورد تعهدات للبنك وانت بتستلم ورق الشحنة انك هتسدد فى تاريخ الاستحقاق او البنك هو اللى بيتعهد بالسداد عنك وطبعا كل ده بعمولات للبنك 

فى نوع تانى اسمه الدفعات وهنا انت كمستورد ممكن تسدد قيمة الفاتورة على دفعات تبدأ بعد فتح الاعتماد وبيكون منصوص عليها فى شروط الاعتماد