تغيير مرتقب لمنظومة الدعم في مصر.. هل تدخل اللحوم والدواجن بطاقات التموين؟

اللحمة والفراخ ممكن يدخلوا منظومة التموين في مصر.. وتغيير كبير مرتقب في طريقة حصول المواطنين على الدعم، بداية من يناير 2027.

لكن هل معنى كده إن المواطن هيقدر يشتري اللحوم والدواجن ببطاقة التموين؟ وإيه اللي هيتغير في الدعم اللي بيحصل عليه كل شهر؟

الحكومة بتجهز للتحول من نظام الدعم العيني إلى منظومة دعم نقدي سلعي، تدي للمواطن حرية أكبر في اختيار احتياجات أسرته بدلًا من الاقتصار على قائمة محدودة من السلع التموينية.

والقائمة المقترحة مش هتقف عند الزيت والسكر والمكرونة، لكنها ممكن تشمل اللحوم والحبوب والشاي واللبن والعدس والبيض والفول والدواجن.

يعني بدل ما تكون اختياراتك محدودة في سلع معينة، الفكرة إنك تقدر توجّه قيمة الدعم المخصصة ليك لشراء المنتجات اللي أسرتك محتاجاها فعلًا.

لكن خد بالك.. فيه فرق بين التوجه لتوسيع قائمة السلع وبين الإعلان النهائي عن آلية التنفيذ. فحتى الآن، تفاصيل التطبيق وقواعد صرف الدعم وقائمة السلع النهائية محتاجة حسم رسمي

والحكومة بتقول إن الهدف من المنظومة الجديدة هو تحسين وصول الدعم لمستحقيه، وزيادة حرية الاختيار، وتقليل الهدر، مش تقليل قيمة الدعم.

لكن السؤال الأهم: هل اللحوم والفراخ هتكون متاحة فعلًا ضمن المنظومة الجديدة، وهل قيمة الدعم هتكون كافية لمواجهة أسعار الأكل؟
الإجابة هتتوقف على تفاصيل التنفيذ وقيمة الدعم اللي هتتحدد للمواطنين قبل تطبيق المنظومة.