763 ألف فدان للطاقة المتجددة في مصر.. كام جيجاوات ممكن تنتجهم المساحة دي؟

بقرار جمهوري جديد، مصر خصصت أكتر من 763 ألف فدان في منطقة غرب الساحل الشمالي بمحافظة مطروح لمشروعات الطاقة المتجددة.. مساحة بتعادل حوالي 3206 كيلومترات مربعة، يعني قرابة 2% من مساحة المحافظة

لكن المفاجأة في حجم القدرات الكهربائية اللي ممكن تستوعبها الأراضي دي.. لو اتخصصت بالكامل لمحطات الطاقة الشمسية، وبنفس الكثافة المساحية لمشروع أوبيليسك في نجع حمادي، ممكن تستوعب نظريًا قدرات تصل إلى 159 جيجاوات

أما لو اتخصصت لمزارع الرياح، فالحسابات بتختلف حسب طبيعة المشروع والمساحة اللازمة بين التوربينات، والتقديرات بتتراوح بين 11 و23 جيجاوات وفقًا لنماذج مشروعات قائمة في مصر.

وطبعًا دي حسابات نظرية، مش قدرات إنتاج مؤكدة، لأن التنفيذ الفعلي بيتوقف على الدراسات الفنية وطبيعة الأرض وشبكات الكهرباء والاستثمارات المطلوبة.

يعني إحنا بنتكلم عن مساحة ضخمة ممكن تفتح الباب لتوسعات كبيرة في الطاقة النظيفة.. والسؤال: قد إيه من الإمكانات دي هيتحول لمشروعات فعلية على الأرض؟