500 ألف راكب يوميًا.. مونوريل أكتوبر يستعد لربط غرب القاهرة بشرقها
نص مليون راكب يوميًا.. مونوريل جديد هيغيّر خريطة المواصلات في غرب القاهرة، وممكن يخلّي الرحلة من أكتوبر للمهندسين ومنها لشرق القاهرة أسهل بكتير
مونوريل أكتوبر، أو مونوريل غرب النيل، مستهدف يبدأ تشغيله الرسمي خلال أبريل أو مايو 2027، بطول 43.8 كيلومتر، وبيضم 13 محطة، بداية من أكتوبر الجديدة لحد محطة وادي النيل في المهندسين.
والخط مش هيخدم سكان أكتوبر والشيخ زايد بس، لكنه كمان هيربطهم بشبكة مترو الأنفاق، من خلال محطة وادي النيل، اللي منها يقدر الركاب ينتقلوا للخط الثالث للمترو، ويكملوا رحلتهم لشرق القاهرة، مع إمكانية الوصول لمونوريل العاصمة الإدارية.
أما المحطات، فهتخدم مناطق سكنية وجامعات ومراكز تجارية مهمة، من بينها جامعة الأهرام الكندية، وجامعة 6 أكتوبر، ومول مصر، والشيخ زايد، وبشتيل.
والمونوريل هيتحرك بسرعة تشغيلية تصل لـ80 كيلومتر في الساعة، وده غير إنه بيشتغل بالكهرباء، وبيوفر وسيلة نقل جماعي حديثة تستهدف تخفيف الضغط على الطرق وتقليل الاعتماد على العربيات الخاصة.
ومع استكمال تشغيل خطي المونوريل في شرق وغرب القاهرة، مصر بتستهدف بناء شبكة نقل متكاملة بطاقة استيعابية كبيرة، تربط المدن الجديدة بمناطق العمل والخدمات.
لكن السؤال الأهم.. هل المونوريل هيقدر فعلًا يخفف زحمة غرب القاهرة، ويوفر وقت المشاوير اليومية؟
