5 منتجات غذائية مصرية تكتسح أسواق أوروبا.. وصادراتها تحقق قفزات كبيرة
الفراولة والعصائر والزيتون.. 5 منتجات غذائية مصرية بتوسع وجودها في الأسواق الأوروبية، وصادرات القطاع لأوروبا بتقفز لأكتر من مليار و124 مليون دولار خلال أول 8 شهور من 2026
الأرقام دي بتمثل زيادة 16% مقارنة بنفس الفترة من العام الماضي، وبقيمة إضافية وصلت لحوالي 155 مليون دولار.. لكن إيه المنتجات المصرية اللي بتكسب أرض جديدة في أوروبا؟
أولًا: الفراولة المجمدة. الحصان الرابح في القائمة، بصادرات وصلت لـ247.6 مليون دولار، وبكميات تجاوزت 197 ألف طن خلال 8 شهور بس
ثانيًا: العصائر المصرية. صادراتها للأسواق الأوروبية سجلت حوالي 91 مليون دولار، مع فرص للتوسع في أسواق جديدة.
ثالثًا: الزيتون المخلل والمصنع. وصل لـ52.7 مليون دولار، مستفيدًا من الطلب على المنتجات الغذائية المصنعة.
رابعًا: الخضروات المجمدة. سجلت صادراتها 41.2 مليون دولار، وبتفتح فرص أكبر أمام المنتجات المصرية في قطاع الأغذية المجمدة.
خامسًا: محضرات الخضروات.. حققت صادرات بقيمة 40.3 مليون دولار، وده بيعكس تنوع المنتجات المصرية وقدرتها على المنافسة خارج السوق المحلي.
والتحرك المصري مش بيعتمد على زيادة الكميات بس، لكن كمان على تطوير الجودة وسلاسل التبريد والتجميد، وضمان الالتزام باشتراطات سلامة الغذاء الأوروبية، علشان الشركات المصرية تقدر تحافظ على أسواقها وتدخل أسواق جديدة.
ومع مشاركة 107 شركات مصرية في معرض «سيال باريس 2026»، بتتحرك الشركات لاقتناص فرص تصديرية جديدة وبناء علاقات مباشرة مع المستوردين وسلاسل التجزئة الأوروبية.
فهل تقدر المنتجات الغذائية المصرية تحوّل النمو ده لقفزة أكبر في الصادرات الأوروبية؟
