رغم مليارات الاحتياطي والتحويلات.. الدولار طاير في السما
الدولار كسر الـ53 جنيه وبيواصل الصعود.. طب ليه الأخضر بيغلى رغم إن احتياطي مصر من النقد الأجنبي وصل لمستوى قياسي؟ وهل تحويلات المصريين بالخارج بالمليارات مش كفاية لتهدئة السوق؟ وإيه حكاية الأموال الساخنة اللي رجعت تدخل مصر؟
الدولار رجع يضغط على الجنيه من جديد.. وخلال تعاملات النهارده الخميس العملة الأمريكية فضلت فوق مستوى 53 جنيه للبيع في عدد من البنوك.. وسجل أعلى سعر في بنوك البركة والإسكندرية والتنمية الصناعية وسايب عند 53 جنيه و30 قرش للبيع.
أما في البنك المركزي فسجل الدولار 53 جنيه و18 قرش للبيع.. وده بعد ما تجاوز مستوى الـ53 جنيه لأول مرة من مايو اللي فات.
لكن المفارقة إن الأرقام المعلنة عن تدفقات النقد الأجنبي في مصر إيجابية.. فالاحتياطي النقدي ارتفع لمستوى قياسي عند 57.35 مليار دولار في سبتمبر.. وتحويلات المصريين بالخارج قفزت بنسبة 27.2% خلال أول 8 شهور من 2026 لتسجل 33.9 مليار دولار.
كمان تعاملات العرب والأجانب في السوق الثانوية للدين الحكومي سجلت صافي شراء بقيمة 1.2 مليار دولار خلال الأسبوع الماضي.. لكن التفاصيل مهمة لأن العرب سجلوا صافي شراء بحوالي 1.5 مليار دولار.. بينما الأجانب سجلوا صافي بيع بنحو 300.8 مليون دولار.
وده معناه إن التدفقات مش كلها ماشية في اتجاه واحد.. وإن حركة المستثمرين في أدوات الدين بتختلف من فترة للتانية.
أما مصادر النقد الأجنبي فبتشهد تحسن مع زيادة الصادرات والدخل السياحي وتحويلات المصريين بالخارج وإيرادات قناة السويس.
لكن لازم نفهم إن ارتفاع الاحتياطي أو زيادة التحويلات مش معناه بالضرورة إن الدولار هينخفض فورًا.. لأن سعر الصرف بيتأثر كمان بحجم الطلب على العملة الصعبة وحركة التدفقات الداخلة والخارجة وتوقيت توافر السيولة في السوق
