عايز تبدأ مصنعك؟.. 400 وحدة صناعية جاهزة للتسليم في 10 محافظات
عايز تبدأ مصنعك من غير ما تدخل في دوشة البناء والتجهيزات؟.. وزارة الصناعة أعلنت عن طرح 400 وحدة صناعية جاهزة للتسليم الفوري في 10 محافظات مصرية، بمساحات تبدأ من 48 متر وتوصل لـ960 متر مربع
الوحدات موجودة في 11 مجمع صناعي، وبتغطي أنشطة كتير، منها الصناعات الغذائية والهندسية والكيماوية والمعدنية والدوائية، وكمان الجلود والغزل والنسيج ومواد البناء.
طيب هتقدر تمتلك مصنعك ولا تستأجره؟
الطرح بيتيح التمليك في مجمعات مرغم 2 بالإسكندرية، والسادات بالمنوفية، والمجمع المعدني بالفيوم، وبياض العرب ببني سويف، والمطاهرة بالمنيا، وعرب العوامر بأسيوط، وغرب جرجا بسوهاج، والبغدادي بالأقصر.
أما لو بتدور على التمليك أو الإيجار، فالاختيارين متاحين في مجمع الجنينة والشباك بأسوان، والمجمع الخرساني بالفيوم، ومجمع هو بمحافظة قنا.
والأهم إن فيه تيسيرات في استخراج التراخيص الصناعية، وإمكانية الحصول على تمويل بنكي للمشروع، والاستفادة من برامج جهاز تنمية المشروعات لتمويل الآلات والمعدات وخطوط الإنتاج، بالإضافة للدعم الفني والخدمات التسويقية.
التقديم بدأ من 15 أكتوبر ومستمر لحد 29 أكتوبر 2026، والحجز وسحب كراسة الشروط وتقديم المستندات كلها إلكترونيًا من خلال منصة مصر الصناعية الرقمية.
يعني لو بتفكر تدخل مجال الصناعة، قدامك فرصة تختار وحدة تناسب مشروعك.. بس لازم تراجع كراسة الشروط وتفاصيل التكاليف قبل ما تقدم.
