مليار دولار من العرب في أدوات الدين المصرية.. إيه اللي بيحصل في سوق الدولار؟

هل مليار دولار دخلوا السوق المصرية يقدروا يغيروا اتجاه الدولار؟.. وليه الأموال الساخنة بترجع بقوة لأدوات الدين المصرية رغم ارتفاع سعر العملة الأميركية؟.. وهل تدفقات العرب والأجانب ممكن تعمل ضغط جديد على سعر الدولار خلال الفترة الجاية؟

اللي حصل في تعاملات البورصة الأخيرة كان لافت جدا.. لأن تعاملات العرب في السوق الثانوية للدين الحكومي المصري سجلت صافي شراء وصل لمليار دولار كاملة.

وفي المقابل سجل الأجانب صافي بيع محدود بلغ حوالي 38.7 مليون دولار.. وده خلى إجمالي صافي تدفقات العرب والأجانب يوصل لنحو 967 مليون دولار.

والأهم إن تدفقات الأموال الساخنة مستمرة في العودة لأدوات الدين المصرية.. فتعاملات العرب والأجانب سجلت صافي شراء بقيمة 251.3 مليون دولار في أحدث تعاملات.

وده تحول مهم جدا مقارنة بالأسبوع اللي فات.. لما سجل العرب والأجانب صافي بيع وصل إلى 361 مليون دولار.

لكن الصورة الأكبر بتظهر في أرقام شهر سبتمبر.. لأن السوق سجل صافي شراء من العرب والأجانب بقيمة 702 مليون دولار.. والعرب لوحدهم سجلوا صافي شراء بقيمة 1.528 مليار دولار.. في الوقت اللي سجل فيه الأجانب صافي بيع بحوالي 826.5 مليون دولار.

ورغم عودة التدفقات دي.. الدولار واصل الارتفاع في السوق المصرية خلال التعاملات الأخيرة.

وسجل أعلى سعر في بنك أبوظبي الإسلامي عند 52.38 جنيه للشراء و52.48 جنيه للبيع.. بينما سجل أقل سعر في بنك الإسكندرية عند 52.24 جنيه للشراء و52.34 جنيه للبيع.

أما البنك المركزي المصري فسجل الدولار عند 52.32 جنيه للشراء و52.46 جنيه للبيع.

وده معناه إن عودة الأموال الساخنة لأدوات الدين لسه ما انعكستش بشكل واضح على سعر الدولار.. وبتفضل حركة العملة مرتبطة بعوامل تانية في سوق الصرف وحجم الطلب على الدولار.