البطاطس هتتزرع بتقاوي مصرية.. خطة لوقف فاتورة الاستيراد
البطاطس اللي بتتزرع في مصر.. مصر عايزة تبدأ تنتج تقاويها بنفسها بدل ما تفضل معتمدة على الاستيراد.
السبب إن مصر بتزرع مساحات كبيرة من البطاطس، وبتصدر أكتر من مليون طن من المحصول سنويًا، لكن جزء كبير من احتياجات المزارعين من التقاوي لسه بييجي من الخارج.
وعشان كده فيه تحرك لتوطين صناعة تقاوي البطاطس، من خلال زيادة الإنتاج المحلي وتوفير تقاوي معتمدة وعالية الجودة للمزارعين، وبأسعار وتوقيتات مناسبة.
والخطة مش مجرد إنتاج تقاوي وخلاص..
فيه توجه لبناء منظومة كاملة تبدأ باختيار الأصناف المناسبة للظروف المصرية، وإنتاج التقاوي وفق المعايير الفنية، والرقابة على جودتها، وبعد كده تسويقها وتوصيلها للمزارع في الوقت المناسب.
وده ممكن يقلل فاتورة الاستيراد، ويخفف الضغط على العملة الأجنبية، وكمان يقلل تأثر تكلفة الزراعة بأسعار الشحن والعملات وتغيرات الأسواق العالمية.
والميزة الأهم إن التقاوي المحلية ممكن يتم تطويرها بما يتناسب مع الأراضي والمناخ في مصر، مع استهداف تقاوي خالية من الأمراض وذات جودة مرتفعة، بما يساعد على تحسين إنتاجية الفدان وجودة المحصول.
وعشان الخطة تكبر، فيه تحركات لربط منتجي التقاوي بالجمعيات التعاونية والمزارعين، وإنشاء حقول إرشادية تساعد المزارعين على استخدام التقاوي المعتمدة بالطريقة الصحيحة.
يعني مصر مش بتستهدف بس إنها تنتج بطاطس أكتر..
لكن كمان عايزة تنتج أهم مدخلات زراعتها بنفسها، وتحوّل تقاوي البطاطس من فاتورة الاستيراد.. لصناعة محلية تدعم الإنتاج والتصدير.
