قبل ما تضغط على أي لينك.. إنستاباي يحذر من حيلة لسرقة فلوسك

خلي بالك، لو جالك اتصال أو رسالة بتقولك إن المتصل موظف بنك أو من خدمة عملاء إنستاباي، متديهوش أي بيانات، لأنك ممكن تكون قدام محاولة نصب.

إنستاباي حذر المستخدمين من حيلة جديدة، بيبدأ فيها المحتال بمكالمة تليفون، وبعدها يبعتلك لينك على الموبايل أو الإيميل أو السوشيال ميديا، ويقولك ادخل عليه علشان تحدث بياناتك أو تحل مشكلة في حسابك.

المشكلة أن اللينك ممكن يفتح صفحة شبه موقع البنك بالظبط، ويطلب منك بياناتك البنكية أو الرقم السري أو كود الـOTP، ولو دخلتهم، المحتال يقدر يستخدمهم في معاملات مالية من غير علمك.

وعشان كده، متضغطش على أي لينك مجهول، ومتقولش الرقم السري أو كود التحقق لأي حد مهما كان بيقولك إنه موظف بنك.

ولو شكيت في مكالمة، اقفل فورًا واتصل بالبنك من رقمه الرسمي واتأكد بنفسك.

والبنك المركزي كمان حذر من نفس الأساليب، خصوصا مع استغلال اسم إنستاباي في عمليات النصب الإلكتروني.