القاهرة هتتغير خالص.. مشروع ضخم لتخضير العاصمة وتحويلها لمزار سياحي مفتوح
القاهرة داخلة على تغيير كبير جدًا.. ومش بس في شكل الشوارع والمباني، لكن كمان في شكل المناطق التاريخية اللي ممكن تتحول لمزار سياحي مفتوح.
الرئيس عبد الفتاح السيسي وجه بتبني مشروع لـ"تخضير القاهرة"، بحيث أي مساحة يتم إخلاؤها تتحول لمساحات خضراء، بالتزامن مع استمرار تطوير وإحياء المعالم التاريخية والتراثية في العاصمة.
والفكرة هنا مش مجرد زراعة شوية أشجار أو تجميل ميادين..
الخطة بتستهدف إعادة إحياء قلب القاهرة، وفتح مسارات سياحية متكاملة تربط بين المعالم التاريخية والمساجد والأضرحة والمناطق التراثية.
يعني السائح يقدر يتحرك من منطقة للتانية في مسار واحد، يشوف تاريخ القاهرة على الطبيعة، بدل ما كل أثر يبقى منفصل عن التاني.
ومع الانتهاء من مشروعات الترميم والتطوير، الهدف إن قلب القاهرة يتحول لمزار مفتوح يستقطب أعداد أكبر من السائحين.
والقصة كمان مرتبطة بتطوير البنية التحتية والمناطق المحيطة بالمعالم التاريخية، عشان القاهرة القديمة ترجع بشكل يليق بقيمتها التاريخية.
وده بالفعل جزء من رؤية أوسع لإحياء القاهرة التاريخية، وتحويل مناطق زي الفسطاط ومحيط سور مجرى العيون ومسارات القاهرة الإسلامية لمقاصد سياحية وثقافية متكاملة.
يعني القاهرة مش بس هتتخضر.. دي بتتحول تدريجيًا لمتحف مفتوح، يجمع بين التاريخ والطبيعة والسياحة في قلب العاصمة.
والسؤال: هل القاهرة القديمة هترجع واحدة من أهم الوجهات السياحية في العالم؟
