مصر للطيران تضرب بقوة.. شراكة عالمية مع برشلونة لـ 2029
مصر للطيران داخلة على خطوة كبيرة جدًا في السوق العالمي.. المرة دي من بوابة واحد من أشهر أندية العالم، نادي برشلونة الإسباني.
الشركة وقعت اتفاقية شراكة ورعاية عالمية مع برشلونة، تمتد لحد نهاية موسم 2028 و2029، وبموجب الاتفاق هتبقى مصر للطيران شريكًا عالميًا للنادي، والناقل الجوي الرسمي والحصري لفرق كرة القدم للرجال وكرة السلة وكرة اليد.
والصفقة مش مجرد اسم على ورق.. شعار مصر للطيران هيظهر كمان على مقدمة قمصان فريق كرة اليد في المباريات الرسمية طوال فترة الشراكة.
الخطوة دي بتفتح لمصر للطيران مساحة أكبر للتواجد قدام جماهير برشلونة في مختلف أنحاء العالم، خصوصًا في الشرق الأوسط وإفريقيا، اللي النادي عنده فيهم قاعدة جماهيرية ضخمة.
وفي المقابل، برشلونة نفسه بيستفيد من الشراكة في توسيع حضوره بالأسواق العربية والإفريقية، من خلال التعاون مع الناقل الوطني المصري.
وبالنسبة لمصر للطيران، فالشراكة بتيجي ضمن خطة لتقوية العلامة التجارية للشركة عالميًا، والتوسع في أسواق جديدة، والاستفادة من شعبية برشلونة الكبيرة في الترويج للشركة واسم مصر على مستوى العالم.
يعني مصر للطيران مش بس هتنقل المسافرين، دي كمان هتحط اسم مصر قدام ملايين من مشجعي برشلونة لحد موسم 2029.
