100 جنيه على مغادرة مصر.. الضرائب توضح الحقيقة

لو سمعت أن فيه رسم جديد على مغادرة مصر، خلينا نوضح الصورة الأول!
رشا عبد العال، رئيس مصلحة الضرائب المصرية، وضحت أن التعديلات الأخيرة على قانون رسم تنمية الموارد المالية للدولة مش معناها فرض رسوم جديدة، لكن الهدف الأساسي منها هو تبسيط الرسوم الموجودة بالفعل وتوحيد طريقة تطبيقها.

ومن أبرز التعديلات، الرسم المقرر على مغادرة أراضي الجمهورية بالنسبة للأجانب، واللي بقى 100 جنيه بدل ما كانت قيمته بتختلف في بعض الحالات.
وبحسب مصلحة الضرائب، توحيد قيمة الرسم جه استجابة لمطالب شركات السياحة، بهدف أن الإجراءات تبقى أوضح وأسهل، ومفيش اختلاف في طريقة التعامل.

وأكدت رئيس مصلحة الضرائب أن وزارة المالية بتراجع التشريعات والإجراءات المالية بشكل مستمر، لمعالجة أي مشاكل بتظهر أثناء التطبيق.

وكمان المصلحة حريصة على توضيح التعديلات للمواطنين ومجتمع الأعمال، عشان كل طرف يبقى عارف التزاماته وطريقة التطبيق بشكل واضح.