الخميس الحاسم.. البنك المركزي هيعمل إيه في الفايدة؟

كل الأنظار يوم الخميس رايحة للبنك المركزي.. والسؤال اللي شاغل ناس كتير: الفايدة هتفضل زي ما هي ولا هنشوف انخفاض جديد؟

البنك المركزي هيجتمع يوم 20 أغسطس لمناقشة أسعار الفائدة، والتوقعات الأقرب حاليًا بتشير لتثبيتها، خصوصًا بعد رجوع التضخم للارتفاع.

التضخم السنوي وصل لـ13% في يوليو، مقابل 12.2% في يونيو، بينما سجل تضخم المدن 14.9%، وده بيخلي قرار خفض الفايدة محتاج حسابات دقيقة.
وكان المركزي خفض الفايدة آخر مرة في فبراير بمقدار 1%، لتصل لـ19% للإيداع و20% للإقراض.

والخبراء شايفين إن التثبيت ممكن يكون الأنسب حاليًا للحفاظ على جاذبية الجنيه والاستثمارات الأجنبية، وامتصاص السيولة والسيطرة على التضخم.

لكن في المقابل، فيه توقعات إن المركزي يبدأ خفض تدريجي قبل نهاية السنة، لو التضخم رجع لمسار هبوطي واضح.

يعني القرار مش بس عن الفايدة.. ده قرار له تأثير مباشر على الأسعار والاستثمار والجنيه والاقتصاد كله.