بأوامر من السيسي.. مصر تتفاوض لإضافة مفاعلات جديدة لمحطة الضبعة

اللي بيحصل في محطة الضبعة النووية ممكن يغير حسابات الطاقة في مصر بشكل كبير.. وزير الكهرباء محمود عصمت كشف إن الرئيس السيسي وجه بزيادة عدد المفاعلات، وفي مفاوضات لإضافة مفاعلين جديدين، وممكن العدد يوصل لـ4 مفاعلات إضافية.

طيب إيه أهمية الكلام ده؟ كل 4.8 جيجاوات من الطاقة النووية ممكن توفر حوالي 8 ملايين متر مكعب غاز، وده معناه تقليل فاتورة الواردات بما بين 1.1 و3.4 مليار دولار، حسب سعر الغاز.

محطة الضبعة أساسًا فيها 4 مفاعلات بإجمالي 4800 ميجاوات، والإنتاج يبدأ في 2028، وبيوصل للطاقة الكاملة بين 2029 و2030.

والأهم؟ مصر متوقعة تسترد تكلفة المحطة خلال 12 سنة من وفر الوقود. يعني الضبعة مش مجرد محطة كهرباء.. دي فاتورة غاز أقل ودولارات بتتوفر.