من غير ما تروح لشركة الكهرباء.. اعرف وادفع فاتورتك من الموبايل

مش لازم تستنى المحصل ولا تنزل شركة الكهرباء عشان تعرف فاتورتك وتدفعها. فاتورة كهرباء أغسطس 2026 تقدر تستعلم عنها وتسددها من الموبايل بكل سهولة.

كل اللي عليك تدخل على المنصة الموحدة لخدمات الكهرباء، وتختار خدمة الاستعلام عن الفواتير، وبعدها تحدد شركة توزيع الكهرباء التابع ليها.

هتدخل اسمك والمحافظة والرقم القومي، وكمان رقم العداد المكون من 10 أرقام، وتضغط استعلام.. وهتظهرلك قيمة الفاتورة المستحقة.

ولو عايز تدفع، تختار خدمة سداد الفاتورة، وتدخل بيانات العداد وكود السداد الإلكتروني الموجود على فاتورة سابقة، وبعدها تختار طريقة الدفع وتأكد العملية.

وكمان فيه طرق تانية للدفع من تطبيقات زي إنستا باي وسهل وماي فوري. يعني فاتورتك في إيدك.. من غير طوابير ولا مشاوير.