من غير تصالح.. هتحول عدادك الكودي لعداد قانوني
عايز تحول العداد الكودي لعداد قانوني لكن واقف بسبب التصالح طب ولو قولتلك إن فيه اتجاه جديد ممكن يغير القصة كلها وممكن آلاف المواطنين يخلصوا إجراءاتهم من غير الشرط ده.
فيه دراسة جديدة داخل شركة الكهرباء بتحويل العدادات الكودية المؤقتة لعدادات قانونية دائمة من غير اشتراط تقديم نموذج التصالح في مخالفات البناء ودي خطوة لو اتنفذت هتكون انفراجة كبيرة لعدد ضخم من المواطنين اللي بقالهم سنين مستنيين يحولوا عداداتهم.
طيب يعني إيه عداد كودي أصلا ؟
العداد الكودي هو عداد بيتحط بشكل مؤقت للعقارات أو الشقق اللي أوراقها القانونية لسه ما اكتملتش وبيكون برقم كودي من غير ما يحمل اسم صاحب الوحدة وهدفه إن المواطن يوصله الكهرباء وفي نفس الوقت الدولة تحفظ حقها.
أما العداد القانوني فهو بيتسجل باسم صاحب الوحدة أو المنتفع بيها وده بيدي صاحب العقار وضع قانوني مستقر وبيسهل عليه أي إجراءات مستقبلية مع شركة الكهرباء أو أي جهة تانية.
الخطوة الجديدة دي جاية علشان تبسط الإجراءات وتخفف الأعباء عن المواطنين خصوصا إن فيه آلاف الأسر معتمدة على العدادات الكودية من سنين وكانت بتواجه صعوبة في تحويلها بسبب شرط التصالح.
وكمان المختصين شايفين إن تحويل العدادات الكودية لعدادات قانونية هيكون خطوة مهمة في ملف تقنين أوضاع العقارات ودعم خطة الدولة في التحول الرقمي وتنظيم الخدمات.
لكن لازم نوضح نقطة مهمة جدا إن ده لسه اتجاه ودراسة داخل شركة الكهرباء ولسه ما صدرش قرار رسمي نهائي بتطبيقه ولو صدر القرار هيكون خبر مهم جدا لآلاف المواطنين اللي مستنيين يحولوا عداداتهم بشكل قانوني.
