من السخنة للعالم.. مصنع "حياة مصر" يفتح أبوابه لـ60 دولة ويصدر نص إنتاجه للخارج
هل فعلًا المنطقة الاقتصادية لقناة السويس بقت وجهة عالمية للاستثمارات؟، وهل زيادة المصانع الأجنبية في مصر هتوفر فرص شغل أكتر للشباب؟، وهل تصدير نصف إنتاج المصنع لـ60 دولة يعتبر نجاح كبير للصناعة المصرية؟، وهل نقل التكنولوجيا للمصانع المصرية أهم من قيمة الاستثمار نفسه؟
الاستثمارات الأجنبية بقت دلوقتي بتدور على مصر ومش مجرد كلام، لكن أرقام ومصانع شغالة وإنتاج بيتصدر للعالم كله.. وآخر مثال على ده، مصنع "حياة مصر" للمنتجات الصحية، واللي يعتبر واحد من أكبر الاستثمارات التركية الموجودة في المنطقة الاقتصادية لقناة السويس، وتحديدًا في العين السخنة.
المصنع ده بدأ شغله في مصر من سنة 2012، لكن مع مرور الوقت فضل يكبر ويوسع استثماراته لحد ما وصلت النهارده لحوالي 632 مليون دولار داخل مصر، وده رقم كبير بيوضح حجم الثقة في السوق المصري.
اللي ساعد المصنع ينجح بالشكل ده هو المكان اللي موجود فيه.. المنطقة الاقتصادية لقناة السويس بقت واحدة من أهم المناطق الصناعية في الشرق الأوسط، لأنها فيها بنية تحتية قوية جدًا، وقريبة من الموانئ العالمية، وكمان على أهم ممر ملاحي في العالم، وهو قناة السويس، الميزة دي خلت المصنع يقدر ينقل البضائع بسرعة، ويوفر في تكاليف الشحن، وبالتالي ينافس في الأسواق العالمية بسهولة أكبر .
المفاجأة أن المصنع مش بيشتغل علشان السوق المصري بس، لكن بيصدر حوالي 50% من إنتاجه لأكتر من 60 دولة حول العالم، وده معناه دخول عملة صعبة لمصر، وزيادة في الصادرات، وتحسين وضع الصناعة المصرية في الأسواق الخارجية.
لكن المكسب مش فلوس وبس، المصنع كمان وفر حوالي 3500 فرصة عمل مباشرة وغير مباشرة، واعتمد بشكل كبير على العمالة المصرية، مع تدريب مستمر على أحدث أنظمة التشغيل والجودة والسلامة، وده معناه أن الاستثمار الأجنبي مش بيجيب فلوس بس، لكنه كمان بينقل خبرة وتكنولوجيا جديدة.. المصنع بيستخدم خطوط إنتاج حديثة جدًا، وأنظمة روبوتات وأتمتة، ودي تكنولوجيا كانت موجودة في دول متقدمة، لكن دلوقتي بقت بتشتغل داخل مصر، والمهندسين والفنيين المصريين بقوا بيتدربوا عليها وبيكتسبوا خبرات جديدة.
كمان المصنع مهتم بالبيئة، وحصل على شهادات جودة عالمية زي ISO 9001، وشهادات للبيئة والسلامة المهنية، وبيعتمد على أنظمة لترشيد استهلاك المياه والطاقة، وده بيخليه من المصانع الحديثة اللي بتشتغل بمعايير عالمية.
مدير المصنع أكد أن المنطقة الاقتصادية لقناة السويس ما كانتش مجرد مكان أقاموا فيه المصنع، لكنها كانت شريك حقيقي، لأنها قدمت تسهيلات كبيرة ودعم مستمر شجع المجموعة إنها تكمل استثماراتها وتوسع نشاطها في مصر، وده بيأكد أن الدولة بتحاول تحول المنطقة الاقتصادية لقناة السويس لمركز صناعي عالمي، يجذب شركات أكتر من دول مختلفة، ويخلي مصر قاعدة إنتاج وتصدير للأسواق العالمية.
