البنك مش بس حساب وكارت.. شوف CIB بيبني مدن إزاي؟
لما تسمع كلمة بنك، أول حاجة بتيجي في بالك إيه؟، حساب بنكي؟ كارت؟ قرض؟ ولا شهادة استثمار؟. طب تخيل إن البنك ممكن يكون ليه دور أكبر بكتير من كده، يعني البنك مش بس بيحطلك فلوس في حساب أو يموّل لك عربية أو شقة.. البنك ممكن كمان يساعد في بناء مدينة كاملة.
وده بالظبط اللي بيعمله البنك التجاري الدولي CIB، اللي بيدعم مشروعات عقارية كبيرة، وبيوفر تمويلات ضخمة تساعد الشركات تنفذ مشروعاتها، وفي نفس الوقت بيقدم حلول تمويلية تساعد المواطنين على تملك الوحدات السكنية.
هو إزاي البنك بيدعم بناء المشروعات؟ أي مشروع عقاري كبير محتاج فلوس ضخمة عشان يتبني ويتنفذ، من شراء الأرض، للبنية التحتية، للطرق، والمرافق، لحد بناء العمارات والوحدات والخدمات.
وهنا بيظهر دور البنك.. البنك ممكن يوفر التمويل اللازم لشركة التطوير العقاري، وده بيساعدها تكمّل تنفيذ المشروع بدل ما تعتمد بس على السيولة الموجودة عندها. وده اللي حصل مع CIB، اللي شارك في ترتيب وإدارة تمويل مشترك بقيمة 18 مليار جنيه، لمدة 10 سنين، لصالح شركة أوراسكوم العقارية.
التمويل ده هدفه دعم استكمال أعمال التطوير في مشروع "أو ويست" في غرب القاهرة، وطبعًا، لما نتكلم عن تمويل بـ18 مليار جنيه، ولمدة 10 سنين، فإحنا بنتكلم عن استثمار طويل الأجل، والبنك هنا مش مجرد جهة بتموّل مشروع وخلاص، لكنه شريك في تمكين المشروع من الاستمرار وتنفيذ خططه.
طيب المواطن العادي يستفيد إزاي؟
هنا النقطة المهمة، لما البنك يموّل مشروع عقاري كبير، ده بيساعد المطور إنه ينفذ المشروع ويوفر وحدات سكنية وخدمات ومرافق. لكن دور البنك مش بيقف عند تمويل الشركات، البنوك كمان بتوفر حلول تمويل عقاري للمواطنين، وده معناه إن الشخص اللي عايز يشتري وحدة سكنية، ممكن يلاقي قدامه أنظمة تمويل وسداد على فترات زمنية مناسبة، بدل ما يدفع قيمة الوحدة بالكامل مرة واحدة.
يعني ببساطة، المطور محتاج تمويل عشان يبني، والمواطن محتاج تمويل عشان يشتري، والبنك موجود في النص بيوفر الحلول المالية للطرفين، وده بيخلق حلقة متكاملة بين التمويل والاستثمار والسكن.
لكن الموضوع أكبر من مجرد شقة أو مشروع عقاري، قطاع العقارات في مصر مرتبط بقطاعات كتير جدًا، ولما مشروع جديد يبدأ يتبني، ده معناه شغل للعمال والمهندسين، وطلب على الأسمنت والحديد، والأدوات الصحية، والكهرباء، والأثاث، والتشطيبات، والنقل، والخدمات.
يعني كل جنيه بيتحط في مشروع عقاري، ممكن يحرك معاه قطاعات اقتصادية تانية، وعشان كده، دعم القطاع العقاري من خلال التمويل المصرفي ممكن يكون ليه تأثير أوسع على الاقتصاد كله.
وهنا بييجي دور CIB في دعم القطاعات الحيوية، ومنها قطاع التطوير العقاري، من خلال تمويل المشروعات اللي ليها قيمة اقتصادية واجتماعية، وبتساهم في توفير فرص عمل وتنشيط قطاعات مرتبطة بالبناء والتشييد.
كمان الشراكة بين البنوك وشركات التطوير العقاري بتلعب دور مهم في تنفيذ مشروعات عمرانية كبيرة، ومع وجود مطورين كبار زي أوراسكوم للتنمية، بيظهر شكل من أشكال التكامل بين القطاع المصرفي والقطاع العقاري.
المطور عنده الأرض والخبرة والخطة، والبنك بيوفر التمويل والخدمات المالية، والنتيجة في النهاية مشروع بيتنفذ على أرض الواقع، وده بيساعد على التوسع العمراني وإنشاء مجتمعات جديدة فيها سكن وخدمات وفرص عمل.
