هتسكن دلوقتي وتمتلك بعد 6 سنين؟.. اعرف لو ليك شقة إيجار تمليكي
الأربعاء 15/يوليو/2026 - 01:00 ص
لو نفسك في شقة، لكن مقدم الحجز هو العقبة.. يبقى الخبر ده يهمك.
وزارة الإسكان بتستعد لطرح شقق بنظام الإيجار التمليكي، والميزة إنك تسكن الأول، وبعد 6 سنين من الالتزام بالسداد، تقدر تتقدم لتمليك الوحدة وفقًا للضوابط المعلنة.
طيب.. مين يحق له التقديم؟
الفئات المستهدفة تشمل: محدودي الدخل، وأصحاب الدخول المنخفضة، والشباب حديثي الزواج، والمطلقات والأرامل والمعيلات، وأصحاب الأعمال الحرة والعمالة غير المنتظمة، وكمان ذوي الهمم.
لكن فيه شروط مهمة: لازم يكون سنك 21 سنة أو أكتر، وما تكونش حصلت قبل كده على شقة أو أرض مدعومة من الدولة، وما تكونش استفدت من أي برنامج دعم سكني، وكمان ما تمتلكش أنت أو أسرتك وحدة سكنية مناسبة.
الطرح هيضم حوالي 25 ألف وحدة كاملة التشطيب، ومن المنتظر الإعلان عن تفاصيل الحجز وكراسة الشروط خلال الفترة المقبلة.
