شقة بالتقسيط على راحتك.. تمويل عقاري من بنك ناصر لحد 20 سنة
نفسك تمتلك شقة ومش عارف تبدأ منين؟، ومين يقدر يستفيد من تمويل بنك ناصر؟، وإيه الشروط اللي لازم تتوفر قبل التقديم؟، وهل فعلًا التقسيط ممكن يوصل لـ20 سنة؟
في ظل ارتفاع أسعار العقارات، بقى امتلاك شقة حلم صعب بالنسبة لناس كتير، لكن الدولة بتحاول توفر حلول تساعد المواطنين على تملك وحدات سكنية بأقساط مريحة، ومن أهم الحلول دي برنامج التمويل العقاري اللي بيقدمه بنك ناصر الاجتماعي.
طيب مين يقدر يستفيد من البرنامج ده؟.. الحقيقة أن التمويل متاح لفئات كتير، منها العاملين في الحكومة، وموظفي القطاع الخاص، وأصحاب المهن الحرة، وكمان أصحاب المشروعات الصغيرة ومتناهية الصغر، لكن بشرط مهم جدًا، وهو أن المتقدم يكون محول رسميًا من صندوق الإسكان الاجتماعي ودعم التمويل العقاري.
طب إيه الشروط؟.. لازم سن المتقدم يكون من 21 سنة لحد 50 سنة وقت تقديم الطلب، وكمان ما يكونش هو أو زوجته أو أولاده القصر مالكين وحدة سكنية تانية.
كمان يشترط أنه ما يكونش حصل قبل كده على دعم سكني من الدولة أو قطعة أرض أو قرض إسكان مدعوم.
الميزة الأكبر هنا أن فترة السداد ممكن توصل لـ20 سنة كاملة، وده بيخلي قيمة القسط الشهري مناسبة لشريحة كبيرة من المواطنين.
أما خطوات التقديم، فبتبدأ بعد مراجعة أوراق العميل في وزارة الإسكان وتحويل الملف لبنك ناصر، وبعدها بيتوجه لأقرب فرع بالبنك ويقدم المستندات المطلوبة.
بعد كده البنك بيعمل استعلام وتقييم ائتماني ومراجعة للبيانات، ولو تمت الموافقة بيتم تحديد قيمة المقدم والقسط الشهري.
الهدف من المبادرة هو تخفيف الأعباء عن الأسر المصرية ومساعدتها في امتلاك سكن مناسب بأقل ضغط مالي ممكن.
