غيار الزيت بقى بكام؟.. طرق ذكية تغير زيت عربيتك مجانا أو بأقل تكلفة

مع دخول الصيف وزيادة السفر.. أهم حاجة لازم تعملها لعربيتك هي تغيير الزيت. لكن المشكلة إن أسعار غيار الزيت بقت مرتفعة، خصوصًا مع الزيوت التخليقية الحديثة.

حاليًا أسعار غيار الزيت العادي بتبدأ من حوالي 700 جنيه، وممكن توصل لـ1200 جنيه شاملة الفلتر في العربيات الصغيرة والمتوسطة.

أما الزيوت التخليقية أو شبه التخليقية، فأسعارها ممكن تبدأ من 1500 جنيه وتعدي 3500 جنيه في بعض السيارات الحديثة. والفرق بيكون حسب نوع الزيت وعدد الكيلومترات اللي يستحملها، لأن فيه زيوت بتتغير كل 5 آلاف كيلو، وأنواع تانية ممكن تكمل لـ10 أو 15 ألف كيلو.

لكن السؤال المهم.. إزاي تغيّر الزيت بأقل تكلفة أو حتى مجانا؟

بعض مراكز الصيانة بتقدم عروض إنك لما تغيّر الزيت 3 مرات عندهم، تاخد المرة الرابعة مجانا. وفي برامج نقاط ومحافظ بنكية ومحطات وقود بتدي خصومات على خدمات الصيانة وغيار الزيت.

ولو عربيتك جديدة، غالبًا هيكون معاك كوبونات صيانة مجانية ضمن الضمان، ودي بتشمل تغيير الزيت والفلتر في أول الصيانات.

وفي مواسم معينة، بعض المراكز بتعمل عروض فحص مجاني أو تغيير زيت مجانا عند عمل خدمات تانية زي تغيير الفلاتر أو الكاوتش.

وفي علامات لو ظهرت لازم تغيّر الزيت فورًا: صوت الموتور يعلى
سحب العربية يضعف
البنزين يخلص أسرع
أو لمبة الزيت تنور.

وكمان لو لون الزيت بقى أسود غامق أو فيه ريحة حرق طالعة من الموتور، فده معناه إن التغيير بقى ضروري.
يعني تغيير الزيت مش رفاهية.. ده أهم استثمار يحافظ على موتور عربيتك ويوفر عليك مصاريف أعطال كبيرة بعد كده.