الذهب والفائدة وقرارات الرئيس.. أسبوع عاصف في مصر
أحداث اقتصادية وقرارات مهمة جدا عاشها الوسط المالي والأسواق في الأيام والساعات اللي فاتت.. تعالوا نشوف احداث هزت مصر.
البداية كانت مع الحدث الأهم في البنوك وهو إعلان بنك مصر عن خفض العائد على مجموعة من الأوعية الادخارية، شملت بعض حسابات التوفير والشهادات ذات العائد المتغير.. وحسب البنك تم تخفيض العائد على حساب “سوبر كاش” الجاري ذو العائد اليومي بنسبة 2.25%، لينخفض الحد الأقصى للعائد من 21.75% إلى 19.50%... كمان شمل التخفيض حساب سوبر كاش التوفير الشهري، الذي تراجع عائده إلى 20.25% مقارنة بـ22% سابقًا، إلى جانب الحساب الجاري المخصص لأصحاب المعاشات، الذي تم خفض عائده من 22% إلى 19.75%.
وبخصوص الشهادات الادخارية، خفض بنك مصر العائد على شهادة يوماتي ذات العائد المتغير لأجل 3 سنوات إلى 24.75% بدلًا من 27%.
وفي نفس الوقت أعلن محمد الاتربي الرئيس التنفيذي للبنك الأهلي المصري، أن لجنة الأليكو بالبنك قررت إيقاف إصدار الشهادات البلاتينية السنوية بكافة دورياتها، وتخفيض العائد على الشهادات البلاتينية – 3 سنوات – بكافة دورياتها بقيمة 2% على أن تسري التغييرات اعتباراً من يوم الأحد الموافق 27/4/2025، وذلك من خلال جميع فروع البنك وكافة تطبيقاته الالكترونية كما تم تغيير العائد على الشهادة البلاتينية ذات العائد المتغير بقيمة 2.25 %.
طبعاً قرارات ايقاف شهادات ادخار بعينها وتخفيض العائد لشهادات تانية كان إجراء متوقع من البنوك بعد قرار المركزي المصري بخفض أسعار الفايدة 2.25% في اجتماع الأخير.. عشان البنوك مش هقدر تستحمل التكلفة العالية للفائدة وفي نفس الوقت دي رسالة بتقول إن المؤشرات الاقتصادية بتتحسن.
الحدث الاقتصادي اللي كان ترند في مصر كلها الايام اللي فاتت كانت أزمة سلسلة محلات بلبن الغذائية.. وباختصار الجهات المختصة قررت إغلاق وتشميع حوالي 122 فرع من محلات بلبن الشهيرة ودا بسبب مخالفتها لمواصفات السلامة والأمان وبسبب شكاوي من بعض حالات تسمم وسوء تخزين المواد الخام..
موضوع بلبن كبر اووي بعد استغاثة أصحاب الشركة بالرئيس السيسي واللي طالبوه بالتدخل لإنقاذ 25 ألف أسرة من التشرد.. والحقيقة الموضوع خد زاوية جديدة وخلاه الحدث الأبرز في محركات البحث بعد تدخل الرئيس السيسي واللي وجه ببحث المشكلة وحلها للحفاظ على مصادر دخل آلاف الشباب.. وفعلاً بعدها الحكومة اتحركت واعلنت إن بلبن هيرجع يفتح بعد تسوية كل المشكلات الخاصة بحقوق المستهلك والدولة.
الأوساط الاقتصادية كانت كمان على موعد مع حدث مهم الأيام الأخيرة بعد قرارات الرئيس السيسي لتشجيع الاستثمار والتخلص من العقبات والروتين وكانت أول القرارات هي استبدال الرسوم الي تتقاضاها الجهات والهيئات المختلفة بضريبة إضافية موحدة من صافي لأرباح ودا لخلق مناخ استثماري أكثر تنافسية ويسهل على الشركات والمستثمرين دوامة الرسوم المتعددة والقرار لقى ترحيب كبير الحقيقة من الجهات المعنية.
الرئيس السيسي وجه كمان باختصار الزمن في إجراءات الإفراج الجمركي ودا لتسريع عملية التبادل التجاري وزيادة مكاسب المستثمرين وتحسين سمعة المواني المصرية.. الرئيس السيسي أصدر كمان تعليمات مهمة بخصوص تطوير العمل في صندوق مصر السيادي في المرحلة الجاية وتعزيز رأس المال والاستثمار.
منجم السكري كان حاضر بقوة في المشهد الاقتصادي في الساعات الأخيرة ودا بسبب النقلة الجديدة في إدارة أشهر منجم دهب مكشوف في العالم .. ودا بعد توقيع وزارة البترول والثروة المعدنية الاتفاق النهائى مع شركة أنجلو جولد العالمية وهي المستثمر الجديد فى منجم السكرى بعد أن تم توقيعه بالأحرف الأولى نهاية 2024 بعد استحواذها على شركة سنتامين الحكومية المشغلة للمنجم في صفقة وصلت قيمتها لـ 2.5 مليار دولار.
انتقال إدارة تشغيل منجم السكري خطوة وصفها خبراء التعدين هتحدث نقلة في انتاج المنجم وهتضخ استثمارات ضخمة لتنميته وزيادة الانتاج وتشجيع عمليات الاستكشاف عن المعدن الأصفر وتطبيق تقنيات حديثة فى القطاع المهم جدا ودا ساعد فعلا في جذب شركات عالمية جديدة زي شركة باريك جولد الكندية وهي واحدة من أكبر الشركات الرائدة في مجال تعدين الدهب عالميا واللي أعلنت رغبتها في الحصول على مناطق امتياز جديدة في مصر.
أخيرا مع الحدث اللي سيطر على الأسواق الفترة. اللي فاتت ولسه مستمر معانا وهو القفزات الجنونية في أسعار الدهب بالصاغة المصرية ووصول عيار 21 إلى 5 آلاف جنيه بالضريبة والمصنعية لاول مرة في تاريخه خلال تعاملات الأسبوع الماضي قبل مايتراجع بشكل نسبي.
وبالارقام الدهب زاد بنسبة تقريباً 18% في السوق المحلي في 2024 .. يعني اللي اشترى ذهب بمليون جنيه السنة اللي فاتت .. دلوقتي معاه ذهب بمليون و180 ألف جنيه .. بس المشكلة إن اللي عايز يشتري دلوقتي .. هيحتاج يدفع دم قلبه .. والسبب.. جزء منه بسبب ارتفاع سعر الأونصة عالمياً .. والجزء التاني بسبب سعر الصرف والتضخم في مصر.
توقعات المحللين لسعر الذهب في الشهور الجاية بتقول إن اللي جاي اصعب.. جولدمان ساكس مثلا توقع وصول الأونصة إلى 3700 دولار في منتصف 2026 .. بس فيه ناس زي الملياردير نجيب ساويرس .. بيقول إن الدهب ممكن يوصل 5000 دولار في المستقبل القريب .. يعني لو ده حصل .. الجرام عيار 21 في مصر ممكن يبقى أغلى من كده بكتير .. بس فيه سيناريو تاني .. لو الدولار قوّى أكتر بسبب سياسات ترامب .. أو لو الفيدرالي الأمريكي رفع الفايدة .. الدهب ممكن يهدى شوية .. عشان الدولار لما بيقوى .. الذهب بيبقى أغلى على المستثمرين اللي بيشتروا بعملات تانية.
