قرار رئاسي هيغير قواعد اللعبة في عالم الاستثمار.. السيسي اتدخل بنفسه
من ساعات الرئيس عبد الفتاح السيسي وجه باستبدال كل الرسوم اللي بتتاخد من المستثمرين .. سواء شركات محلية أو أجنبية .. بضريبة إضافية موحدة على صافي الربح .. فايه معنى الكلام ده؟ .. وهيغير إيه في مناخ الاستثمار في مصر؟ .. ومين اللي هيستفيد؟ .. وهل فيه حد ممكن يتضرر؟
أول حاجة .. إيه يعني الرسوم دي؟
لو بتشتغل في بيزنس أو عندك شركة في مصر .. أكيد عارف إن فيه رسوم كتير بتتدفع لجهات وهيئات مختلفة .. رسوم تراخيص .. رسوم خدمات .. رسوم بيئية .. رسوم تفتيش .. وكل جهة ليها كشف حساب خاص بيها .. المشكلة إن الرسوم دي مش بس بتكلف فلوس .. لكن كمان بتكلف وقت ومجهود .. عشان كل جهة عايزاك تروح لها بنفسك .. أو تبعت مندوب .. وتخلّص أوراق .. وده بيخلي المستثمر يحس إنه في متاهة .. ولو أنت مستثمر أجنبي .. ممكن تقول: "يا عم أنا أروح أحط فلوسي في بلد تاني أسهل.
الرئيس السيسي قال: "كفاية كده" .. بدل ما المستثمر يدفع رسوم لعشرات الجهات .. هنلغي الرسوم دي كلها .. ونحط بدالها ضريبة إضافية موحدة على صافي الربح.
يعني إيه؟
يعني الشركة هتدفع مبلغ واحد بس .. بناءً على أرباحها الناتجة بعد خصم المصروفات .. مش هتدفع كل شوية رسوم منفصلة .. وده بيخلّي الحياة أسهل بكتير.
طيب .. إيه تأثير القرار ده على مناخ الاستثمار؟
القرار ده جزء من خطة مصر عشان تخلّي نفسها وجهة استثمارية جذابة .. الرئيس نفسه قال إنه عايز مناخ استثماري تنافسي .. يعني المستثمر يحس إنه بيشتغل في بيئة سهلة وشفافة .. مش بيجري ورا أوراق ويتصل بمكاتب كل يوم .. القرار ده بيحقق حاجتين مهمين:
تبسيط الإجراءات: بدل ما تروح لـ 10 جهات .. هتتعامل مع جهة واحدة .. وده معناه إنك هتوفر وقت ومجهود .. وكمان هيقلل البيروقراطية اللي بتخنق البيزنس.
القرار ده كمان هيخفف الأعباء المالية لأن الضريبة الموحدة هتكون على صافي الربح .. يعني لو شركتك مكسبانهاش كفاية .. مش هتدفع ضريبة كبيرة .. وده بيخلّي الشركات الصغيرة والمتوسطة تقدر تنافس.
وفي اجتماع الرئيس مع رئيس الوزراء ووزراء المالية والاستثمار والصناعة .. اتكلموا عن خطة أوسع .. زي تدشين منصة للكيانات الاقتصادية .. ودي هتكون زي "ون ستوپ شوب" .. يعني مكان واحد يخلّص كل حاجة للمستثمر .. من التراخيص للضرائب .. وده هيخلّي مصر تنافس دول زي الإمارات والسعودية في جذب الاستثمارات.
ومين اللي هيستفيد من الوضع الجديد ؟
ناس كتير هتستفيد وعلى راسهم المستثمرين المحليين والأجانب الشركات الكبيرة هتستفيد من الشفافية وتوفير التكاليف .. والشركات الصغيرة هتحس إن فيه فرصة تنمو من غير ما الرسوم تقف في طريقها.
كمان رواد الأعمال.. لو عندك فكرة بيزنس وخايف من التكاليف .. القرار ده هيخلّيك تفكر جديًا تفتح مشروعك.. و لما الاستثمار يزيد .. الوظايف هتزيد .. والإنتاج هيكبر .. وده هيدي دفعة للاقتصاد ككل.
طب فيه حد هيتضرر؟
مش بالضرورة .. لكن ممكن بعض الجهات الحكومية اللي كانت بتعتمد على الرسوم دي تحس بضغط مؤقت .. لكن على المدى الطويل .. الاقتصاد هيكبر والإيرادات هتزيد من الضرائب الموحدة دي .. يعني الكل هيطلع كسبان.
الكيد ان قرار استبدال الرسوم بضريبة موحدة هو خطوة جريئة من مصر عشان تقول للعالم: "إحنا جاهزين للبيزنس" .. الخطوة دي هتخلّي الشركات تعرف تشتغل بسهولة أكتر .. وهتقلل الصداع اللي كان بييجي مع الإجراءات .. لو القرار ده اتنفذ صح .. واتكمل مع خطوات زي المنصة الاقتصادية .. يبقى مصر هتبقى فعلًا واحدة من أهم الوجهات الاستثمارية في المنطقة.
