انفراجة كبرى هتنزل أسعار الذهب.. 4 أسابيع على الصفقة الكبرى
يا ترى إيه اللي ممكن يحصل لو أكبر اقتصادين في العالم قرروا يتصالحوا؟ .. تخيل معايا إن أمريكا والصين على وشك يوقّعوا اتفاق تجاري ينهي حرب الرسوم الجمركية اللي نكّدت على الأسواق العالمية؟ هل الدهب وقتها هيفضل ملك الملاذات الآمنة ولا هياخد إجازة؟ .. والدولار هيبقى زي الأسد ولا هيتراجع قدّام العملات التانية؟
خلّيني أحكيلك اللي بيحصل ببساطة .. أمريكا والصين كانوا في حرب تجارية من أيام ما ترامب كان في ولايته الأولى .. رسوم جمركية هنا وردّ صيني هناك .. لحد ما الدنيا بقت زي الماتش اللي محدش عايز يخسّر فيه .. بس النهاردة .. فيه أخبار كويسة وهي إن الرئيس ترامب نفسه قال إنه واثق إن فيه اتفاق تجاري ممكن يتوقّع خلال 3-4 أسابيع .. يعني إحنا على أبواب صفقة كبيرة ممكن تغيّر قواعد اللعبة.
الصين بتتفاوض مع أمريكا بقوة .. وترامب معلّن إنه هيعلّق الرسوم الجمركية الإضافية على دول كتير لمدة 90 يوم .. بس الصين لسه بتواجه رسوم عالية وصلت لأكتر من 200 % على سلعها .. في نفس الوقت .. الصين ردّت برفع الرسوم على المنتجات الأمريكية لـ125% هي كمان .. يعني الوضع كان سخن جدًا .. بس الجديد إن فيه بوادر تهدئة .. وده اللي خلّى الأسواق تبدأ تترقّب.
طب ايه تأثير الاتفاق على الذهب .. هيطلع ولا هينزل؟
الدهب زي ما إنت عارف ملك الملاذات الآمنة .. لما الدنيا بتبقى مضطربة .. الناس بتجري عليه .. والحرب التجارية بين أمريكا والصين كانت سبب رئيسي في صعود الدهب الفترة اللي فاتت .. تخيّل إن أسعار الدهب كسّرت مستويات قياسية ووصلت لتوقعات بـ3700 دولار للأونصة في 2025 حسب بنك جيه بي مورجان.
لو الاتفاق التجاري بقى حقيقة .. والتوترات هديت .. الدهب ممكن ياخد نفس شوية .. يعني الأسعار ممكن تتراجع لأن المستثمرين هيحسّوا إن الدنيا أمان أكتر .. و لما ترامب أعلن إنه هيخفّف الرسوم على بعض السلع الصينية زي الإلكترونيات .. الدهب نزل 15 دولار في يوم واحد! .. بس خلّي بالك .. لو الاتفاق ده اتأخّر أو فشل .. الدهب هيرجع يلمع تاني .. لأن المستثمرين هيرجعوا يخافوا ويتلموا حواليه.
طب الدولار أخباره إيه ؟
نيجي بقى للدولار .. الدولار الأمريكي زي الأخ الكبير في سوق العملات .. بس الفترة اللي فاتت بدأ يترنّح شوية .. ليه؟ .. لأن الحرب التجارية والرسوم الجمركية خلّت الثقة في الاقتصاد الأمريكي تهتز .. لو الاتفاق التجاري تم .. الدولار ممكن يقوى تاني .. لأن الاقتصاد الأمريكي هيستفيد من استقرار الأسواق وزيادة التجارة .. وده هيخلّي الطلب على الدولار يزيد.
طب لو انا مستثمر أعمل ايه؟
لو إنت مستثمر وبتفكّر تشتري دهب أو تحول فلوسك لدولار .. اسمع النصيحة دي .. الدهب دلوقتي في مرحلة ترقّب .. لو عندك دهب .. خلّيك متمسّك بيه لأنه لسه بيحافظ على قيمته على المدى الطويل .. لو ناوي تشتري .. انتظر لحد ما الاتفاق يتأكّد .. عشان ممكن تلاقي فرصة تشتري بسعر أقل.
الكورة حاليا في ملعب أمريكا والصين .. لو وقّعوا الاتفاق التجاري .. الأسواق هتهدى والدولار ممكن يرجع يفرض سيطرته .. بس الدهب هيتراجع شوية .. ولو المفاوضات فشلت الدهب هيستمر فى السيطرة والدولار هيواجه تحديات .. عشان كده .. خلّيك متابع الأخبار وخلّي قراراتك الاستثمارية مبنية على متابعة دقيقة.
