أسعار البنزين هتزيد ولا هتفضل زي ما هي؟ .. هنقولك إيه السناريوهات المتوقعة
يا ترى إيه المنتظر في ملف أسعار البنزين والسولار، وإيه حقيقة وجود قرار حكومي مرتقب قريب جدا بخصوص الأسعار الجديدة، طب هل ممكن الحكومة تثبت الأسعار ولا في زيادة جديدة جاية في السكة.
في الأيام الأخيرة، أسعار البترول العالمية اتراجعت بشكل كبير، عشان تنخفض خلال الساعات الأخيرة بأكثر من 4%، وده حصل بسبب تصاعد التوترات التجارية بين الولايات المتحدة والصين.
وطبعا الحرب التجارية أو حرب الرسوم الجمركية زي ما بيقولوا عليها، أثارت مخاوف عالمية من حدوث ركود اقتصادي، واللي ممكن جدا يُضعف الطلب على الخام، في وقت بتستعد فيه مجموعة أوبك+ لزيادة المعروض.
وواقعيا، تراجع أسعار البترول خام برنت، وكشفت البورصة العالمية عن تراجع أسعار البترول خام برنت وغرب تكساس الوسيط بأدنى مستوياتهما منذ أبريل 2021، وانخفضت كمان عقود خام برنت بمقدار 4%، عاشت تسجل 62.93 دولار للبرميل.
برضو، هبطت عقود خام غرب تكساس الوسيط الأميركي بحوالي 4.36%، إلى 59.31 دولار للبرميل.
وده بيجي في الوقت اللي حصل فيه تراجع لأسعار البترول عالميا بنسبة 7% يوم الجمعة اللي فاتت، خاصة بعد ما كثّفت الصين الرسوم الجمركية على السلع الأميركية، وده في حد ذاته زود من حدة الحرب التجارية ودفع المستثمرين لتسعير احتمالية أعلى لحدوث ركود اقتصادي، عشان كده خسر خام برنت وغرب تكساس الأسبوع الماضي 10.9% و10.6% على التوالي.
وبالنسبة لتوقعات بركود اقتصادي في أمريكا، عندك مثلا جولدمان ساكس، اتوقعت احتمال حدوث ركود اقتصادي في الولايات المتحدة بنسبة 45% خلال السنة الجاية، وخفضت توقعاتها لأسعار النفط.
أما بنك جي بي مورجان، فتوقع هو كمان احتمالية الركود في الولايات المتحدة وعلى الصعيد العالمي، بحيث تصل إلى 60%.
ولو جينا لمصر، فكل المؤشرات بتقول إن في احتمالية لتثبيت الأسعار في الفترة الحالية، بدون الإعلان عن قرار جديد للزيادة.
