مشروع مصري هندي يغير خريطة التصدير في مصر باستخدام المياه
مصر حاليا دخلت مرحلة جديدة من التصنيع، والمرحلة دي هتكون من الأمونيا الخضراء.. ياتري اية هيا الامونيا الخضراء.. وازاي هتتصنع في مصر.. ومصر مستهدفة منها ايرادات اد إيه.
مصر حاليا بدأت تتحول بشكل كلي للاقتصاد الأخضر، والنوع ده من الاقتصاد اصبح هدف رئيسي لاغلب الحكومات حوالين العالم، وكل دول العالم بلا استثناء اخذت خطوات جادة للتحول للاقتصاد الأخضر، خصوصا أنه حاليا تحول لاقتصاد المستقبل.
التحول اللي بدأته مصر لتحويل اقتصادها للاقتصاد الأخضر تضمن بند مهم جدا وهو تصنيع الأمونيا الخضراء في مصر، والمنطقة الاقتصادية لقناة السويس أعلنت ولأول مرة عن نجاح مشروع مصر للهيدروجين الأخضر بالمنطقة الصناعية المتكاملة، وحسمت عقد بقيمة 397 مليون يورو لتوريد الأمونيا المتجددة للاتحاد الأوروبي، ومصر حددت سعر التوريد بألف يورو للطن حتى سنة 2033، وهيتم إنتاجها بالاعتماد على استخدام الهيدروجين الأخضر.
طيب اية حكاية المشروع المصري الهندي لانتاج الأمونيا الخضراء ؟.
في تعاون كبير حصل بين مصر والهند للتوسع في الاستثمارات الخاصة بانتاج الأمونيا الخضراء، ووصلت معدل الاستثمارات اللي ضختها الهند لانتاج الأمونيا الخضراء في مصر لـ8 مليار دولار، وكانت البداية مع شركة رينيو باور الهندية واللي اسست مصنع لإنتاج الهيدروجين الأخضر في منطقة السخنة بطاقة إنتاجيه وصلت لـ 20 ألف طن سنويا قابل للزيادة لحد 220 ألف طن سنويا، والمشروع ده بيتم تنفيذه على مراحل أول مرحلة تجريبية منه استهدفت إنتاج 20 ألف طن سنويا من الهيدروجين الأخضر لإنتاج 100 ألف طن من الأمونيا الخضراء سنويا.
المرحلة الثانية من المشروع بتستهدف التوسع في الإنتاج علشان يوصل لـ 200 ألف طن سنويا من الهيدروجين الأخضر باستخدام التفاعلات الكهربائية واللي هيتم انتاجها برضوا من مصادر الطاقة الجديدة والمتجددة لإنتاج مليون طن سنويا من الأمونيا الخضراء علشان توصل السعة الإجمالية للمشروع لـ 220 ألف طن سنويا من الهيدروجين الأخضر.
طيب اية هيا استخدامات الهيدرجين والأمونيا الخضراء؟.
الهيدروجين والأمونيا الخضراء واحد من اهم الملفات اللي الحكومة بتتوسع في انتاجهم في الوقت الحالي ومصر أعلنت أنها هتنتج الهيدرجين الأخضر الأرخص في العالم، وده عبارة عن وقود حيوي مخصص للسفن والسيارات وهيكون في وقت قريب قوي بديل للبنزين والسولار، وبيكون انتاجه عن طريق ضغطت المياة باستخدام الكهرباء واللي بيتم انتاجها من مصادر الطاقة المتجددة.
