هيغير خريطة الصادرات المصرية.. حكاية برنامج رد الأعباء التصديرية وفايدته للاقتصاد المصري
في كلام كتير موجود في السوق المصري عن برنامج رد الأعباء التصديرية.. ياتري اية هو البرنامج ده واية اختصاصاته.. واية الأهداف اللي الحكومة عايزة تحققها منه.. واية فايديته للاقتصاد المصري.
الحكومة في الوقت الحالي بتستهدف عمل ثورة في الاقتصاد المصري علشان يتحول لاقتصاد قوي ومرن قادر علي التعامل مع كل الصدمات اللي بتنتج عن التوترات الجيوسياسية ومع اكترها حاليا، وعلشان الحكومة عملت حاجة اسمها برنامج رد الاعباء التصدير والحكومة تعهدت بالانتهاء منه قبل نهاية مارس وهيتم تطبيق مع العام المالي الجديد واللي بيبدأ في يوليو وهيستمر العمل به لمدة 3 سنين.
الحكومة شايفة أن برنامج رد الأعباء التصديرية هيعمل طفرة كبيرة خصوصا أن هيتعقل باكثر من محور أهمه ملف تعميق الصناعة، والبرنامج ده هيكون خاص بالمصنع أو المصدر وهيستهدف زيادة نسبة المكون المحلي بشكل سنوي، وتشجيع ودعم الصناعة المصرية بصورة أكبر، وصناعات محددة مستهدفة بعينها باعتبارها بتتمتع بميزة تنافسية، علشان تحقق الطفرة المطلوبة في الصادرات المصرية، وتحقق المستهدف اللي الدولة عايزة توصل له 2030 بالوصول لتحقيق 140 مليار دولار كصادرات .
طيب ازاي الحكومة بتحط بنود برنامج رد الأعباء التصديرية وازاي هيخدم الاقتصاد المصري؟.
الحكومة ممثلة في وزيري المالية والاستثمار بيعقدوا جلسات مناقشات مكثفة جدا مع كل مسئولي المجالس التصديرية علشان يناقشوا بنود البرنامج، وهيتم اعلانه بشكله الكامل خلال اسبوعين من النهاردة وتحديدا بعد أجازة عيد الفطر المبارك، والحكومة شايفة وحاطة أمل كبير جدا علي البرنامج ده أنه هيكون السبب في نقل الاقتصاد المصري من المكانة الحالية لمكانة بعيدة جدا وهيكون سبب رئيسي في زيادة الصادرات المصرية.
المناقشات اللي بتقوم بيها الحكومة مع المستثمرين متقفتش علي الوزراء بس، لا ده كمان رئيس مجلس الوزراء الدكتور مصطفي مدبولي خلال الفترة اللي فاتت عقد اجتماع مع أعضاء اللجنة الاستشارية لتنمية الصادرات وتحديدا في قطاعات الصناعات النسيجية والملابس الجاهزة والحاصلات الزراعية والصناعات الطبية، وتم الاتفاق علي خطوات كتيرة الهدف منها زيادة الصادرات في القطاعات وزيادة ايرادات التصدير منهم من 14 مليار دولار إلي 34 مليار دولار خلال 5 سنين، خصوصا أن الهدف ده هو هدف رئيسي واساسي عند الدولة كلها وهو مضاعفة الصادرات المصرية في كل المجالات.
برنامج رد الأعباء التصديرية واللي الحكومة بصدد اعلانه هيتضمن زيادة الدعم الموجه للأنشطة التصديرية بنسبة هتوصل لـ 50% مقارنة بالبرنامج اللي فات، وده هيكون حافز كبير للقطاعات الإنتاجية لمواصلة النمو بالصادرات في الفترة اللي جاية، ده غير أن البرنامج بيستهدف كمان زيادة دعم الشحن من 50% إلى 80% من قيمة فاتورة الشحن، وزيادة المخصصات المتعلقة بالصادرات للدول الأفريقية، ده غير أن بيستهدف زيادة دعم تنشيط الصادرات فى مشروع الموازنة العامة للدولة لـ 4 مليارات و200 مليون جنيه.
