الجنيه الرقمي.. مفاجآت جديدة في مشروع البنك المركزي الأهم
ايه حكايه الجنيه الرقمي وامتي البنك المركزي المصري هيصدره.. وايه الفايدة منه وازاي هيدخل بالاقتصاد المصري لمستويات جديدة.. وايه علاقته بالتحول الرقمي.
العالم كله بيسابق الزمن في استخدام التكنولوجيا الحديثة في كل المجالات ودا بعد التطورات التكنولوجية الرهيبة في الفترة الأخيرة واللي وصلت للذكاء الاصطناعي والموظف الروبوت .. وكمان التطورات السريعة جدا في المعاملات المالية والتجارية دوليا ودخول عصر العملات الرقمية والمدفوعات اللحظية وكل ساعة فيه جديد في عالم المال والبنوك والمصارف وإدارة المال وانتقاله عبر العالم والدولة اللي هتتخلف عن النظم المالية الجديدة مش هتعرف تتعامل مع العالم ولا هيكون ليها وجود وسط المنافسة الشرسة والتطور التقني.
مصر بدأت بدري جدآ وقرأت المستقبل وعرفت أن التكنولوجيا الرقمية هي اللي جاية وبدأت بالفعل أضخم عملية للتحول الرقمي والشمول المالي والمدفوعات اللحظية وتطوير جذري في المعاملات المالية والخدمات الجديدة لتسهيل التحويلات وتشجيع الاستثمار مواكبة التطورات السريعة في التكنولوجيا المالية وظهرت تطبيقات التحويلات السريعة واللحظية زي اسنتاباي واللي بيتعامل عليها 12 مليون مشترك وقبلها ظهرت محافظ الكاش على الموبايلات وبجانب تطور آليات وتكنولوجيا الخدمات المالية بشكل عام.
الجنيه الرقمي واكيد حضرتك سمعت المصطلح دا قبل كده لان دا مشروع المستقبل اللي بيحضره ويجهزه البنك المركزي المصري في الخدمات المالية الجديدة وهو المشروع المالي اللي بيعتبر التطور الطبيعي للخدمات المالية في مصر مع التطور الهائل في كل مناحي الحياة المصرية والتقدم الكبير في القطاعات الاقتصادية والاستثمارية واللي استدعت خدمات مالية متطورة..
نرجع للجنيه الرقمي.. ودا باختصار عبارة عن نسخة رقمية من النقود الورقية اللي بيصدرها البنك المركزي المصري وبدأت فكرة العملات الرقمية تظهر في البنوك المركزية وكل بنك مركزي لكل دولة بيقوم دلوقتي بإصدار عملة خاصة به لتنطيم العمل بين البنوك المركزية حول العالم (العملات الرقمية للبنوك المركزية (CBDCs).. يعني دلوقتي فيه نظام مالي عالمي جديد خاص بالعملات الرقمية وهي بتساوي نفس قيمة العملات الورقية لكن بيتم تداولها بشكل إلكتروني.
وزي ما قلنا الجنيه الرقمي بيشبه الجنيه العادي في قيمته والتسلسل اللي عليه لكنه غير ملموس البنوك المركزية ومنها البنك المركزي المصري فكروا في إصدار العملات الرقمية الجديدة لأسباب كتير منها مسايرة التطور السريع والتقني في التكنولوجيا المالية وكمان تقليل استخدام الكاش والمطبوعات النقدية وتوفير تكلفة طباعة النقود وتقليل التلوث وكمان عشان زيادة الأمان المالي للثروات والأموال.. بجانب أن استخدام العملات الرقمية ومنها الجنيه الرقمي بيرفع مستوى الشفافية في تدفقات الأموال وتعزيز القدرة التنافسية للعملة الوطنية، وتحسين كفاءة وفاعلية السياسة النقدية وزيادة التعاملات التجارية وتقليل تزوير العملة وحرية وسرعة الحركة التجارية.
طيب أمتي الجنيه الرقمي هيظهر في البنوك ؟
سبق ومركز معلومات ودعم اتخاذ القرار بمجلس الوزراء قال إن مصر شغالة بنشاط على تطوير مشروع العملة الرقمية للبنك المركزي، والمعروف بالجنيه الرقمي، لزيادة عدد المحافظ المالية الرقمية لتصل إلى مستوى 80 مليون محفظة رقمية بحلول عام 2030.. يعني خلال 3 أو 4 سنين هيكون الجنيه الرقمي واقع ملموس وبيتم التعامل معاه بسهوله.
