السر في الشروط والفائدة.. شوف ليه مصر اتجهت للاقتراض من بنك التنمية الجديد
مصر في الوقت الحالي بتحاول توصل لمصادر بديلة للتمويل الخارجي بديل عن صندوق النقد .. والحل هيكون في صندوق التنمية الجديد.. ياترى ايه حكاية الصندوق ده.. وهل له مميزات عن صندوق النقد الدولي.
في الفترة الاخيرة وتحديدا من وقت المراجعة الرابعة لقرض الـ8 مليار دولار واللي مصر حصلت علي موافقته من صندوق النقد الدولي في مارس 2024، حصل شوية خلافات بين الحكومة وبين صندوق النقد الدولي خصوصا ان شروط الصندوق كلها لصرف شرائح القرض بتتعلق برفع الدعم عن السلع والخدمات اللي بتقدمها الحكومة للناس، وفي الفترة اللي فاتت وتحديدا قبل المراجعة الرابعة لصرف شريحة قرض الـ8 مليار واللي وصلت قيمتها لـ1.2 مليار دولار الحكومة رفضت تنفيذ اغلب شروط الصندوق لرفع الدعم خصوصا عن المواد البترولية زي البنزين والسولار وشرائح الكهرباء ورغيف الخبز.
الاختلاف اللي حصل بين الحكومة وبين صندوق النقد، خصوصا أن الحكومة كانت شايفة أن صندوق النقد الدولي لازم يأجل تنفيذ شروطه لرفع الدعم بسبب الظروف الاقتصادية اللي كانت بتمر بيها مصر واللي اثرت علي الوضع الاقتصادي للمواطن المصري، والحكومة شافت أنه مش هينفع تحصل اي زيادة في الإسعار، وبالتالي القيادة السياسية وجهت الحكومة بالتفاوض مع صندوق النقد الدولي لتاجيل وتخفيف تنفيذ شروطه لرفع الدعم وده اللي حصل وفعلا الحكومة نجحت في تاجيل رفع الدعم لـ6 شهور كاملين كان المفروض يحصل فيهم تحريك لأسعار المواد البترولية وشرائح الكهرباء.
طيب اية اللي حصل بعد ما حصل خلاف بين مصر وصندوق النقد الدولي ؟.
بعد ما حصل خلاف بين مصر وصندوق النقد الدولي، الحكومة بدأت تدور علي مصادر خارجية بديلة علشان تمول مصر في الفترة اللي جاية، وكان الحل من مجموعة البريكس واللي مصر بقت عضو عامل فيه خصوصا أن مجموعة البريكس عندها بنك خاص بيهم بيمول الدول في عمليات التنمية والبنك ده اسمه بنك التنمية الجديد، وفعلا مصر بدأت تتحرك علشان تحصل علي قروض من البنك ده لتعويض غياب دعم صندوق النقد الدولي، وفعلا الحكومة المصرية قدمت طلب للبنك للحصول علي قرض بقيمة مليار دولار.
بنك التنمية الجديد بيقدم لمصر مميزات مش هيلاقيها في اي مكان تاني، أول المميزات دي أن الفايدة بتاعه اقل بكتير من اي مكان في العالم سواء كان عادية أو صناديق دولية زي صندوق النقد الدولي، والقروض اللي بيقدمها البنك ده بتكون خاصة بالدول الأعضاء في المجموعة وطبعا مصر بقت رسمي عضو عامل في مجموعة البريكس ومن حقها حاليا تطلب الحصول علي قروض من البنك لاستكمال النهضة الاقتصادية والتنموية واللي بتقوم بيها الحكومة في الوقت الحالي، والحكومة شايفة أن بنك التنمية الجديد هيكون بديل مثالي وافضل بكتير من صندوق النقد الدولي خصوصا أن شروطه هتختلف تماما عن شروط صندوق النقد الدولي، وكمان الفايدة علي القروض هتكون اقل بكتير عن باقي الجهات المانحة للقروض.
