شبح تخفيف الأحمال.. الحكومة هتعمل إيه في صيف 2025
الحكومة بتستعد إزاي لصيف 2025.. وهل ياترى هيكون فيه تخفيف أحمال زي الصيف اللي فات وإيه المفاجأة اللي الكهرباء مجهزاها للمصريين.
حسب نشرة المناخ العالمي الصيف اللي بيعدي اللي بعده بيكون أصعب منه بسبب ظاهرة التغير المناخي والاحتباس الحراري ودا معناه إن صيف 2025 ممكن يكون أشد حرا من الصيف اللي فات.. واللي المصريين عانوا فيه من سياسة تخفيف الأحمال بسبب الحرارة الشديدة ونقص الوقود اللازم لتشغيل المحطات بسبب الظروف الصعبة اللي كانت بتمر بيها البلد من كل ناحية بسبب الأزمات الخارجية ونقص إنتاج الغاز وزيادة الاستهلاك.
طيب ايه اللي هيحصل في الصيف اللي جاي.
المهندس كريم بدوي، وزير البترول والثروة المعدنية قال إن الوزارة عاملة حسابها كويس جدا لصيف 2025 وإن فيه تخطيط مبكر واستعداد الجيد لفصل الصيف بالتنسيق مع وزارة الكهرباء والطاقة المتجددة كفريق عمل واحد ضمن خطة العمل الحكومي التكاملي لتلبية احتياجات الاستهلاك من الطاقة الكهربائية.
وزير البترول قال إنه فيه اجتماعات دورية ببين المسئولين في الوزارتين لتكثيف التنسيق بين فرق العمل من الجانبين استعدادا لفصل الصيف من خلال اجتماعات دورية لمراجعة خطط الاستعداد للفترة دي وضمان الجاهزية التامة لمواجهة أي طارئ.
الوزير قال كمان إن الشبكة القومية للغازات الطبيعية اللى بتتولي شركة جاسكو تشغيلها وإدارتها كشريان حيوى لإمداد المستهلكين وقطاعات الاقتصاد والإنتاج المختلفة بالطاقة جاهزة من دلوقتي لتمرير أي إمدادات بالوقود لمحطات إنتاج الكهرباء.
وزير الكهربا من ناحيته أكد إن زمن تخفيف الأحمال انتهي ومش هنشوفه في الصيف الجاي لأن ازمة نقص الوقود اللازم لتشغيل المحطات انتهت ومصر قدرت توفر الغاز اللازم لفصل الصيف في الشهور اللي فاتت واستغلت انخفاض الأسعار عالميا لشراء مخزون كبير بجانب زيادة معدلات الإنتاج المحلي من الغاز بعد حل أزمة متأخرات شركات التنقيب في مصر والإعلان عن اكتشافات جديدة للغاز والبدء في تطوير حقل ظهر في البحر المتوسط والعودة لمعدلات الانتاج السابقة.
عدم تخفيف الأحمال في الصيف الجاي بيأكد إن الدكتور مصطفي مدبولي نفذ وعده للمصريين بعدم تكرار أزمة تخفيف الأحمال اللي عدت تاني وإنها كانت لظروف خارجة عن الإرادة وقتها.
وزير الكهرباء قال كمان إنه خلال أيام هيتم عقد اجتماع بمجلس الوزراء مع الدكتور مصطفى مدبولي لمتابعة توفير الوقود اللازم لتشغيل محطات إنتاج الكهرباء وشرح الموقف على الأرض والاستعدادات لاحتمالات الزيادة القصوى في استهلاك الكهربا في الصيف اللي جاي.
