تطور مهم جدا في البنك المركزي.. إيه اللي بيحصل في ملف الأصول؟
من ساعات تم الاعلان عن إن أصول البنك المركزي المصري وصلت 6.310 تريليون جنيه بنهاية فبراير 2025.. فيا ترى ايه هي الأصول دي بالظبط؟ وليه الناس بتهتم أوي لما بترتفع؟ وهل ده معناه إن الاقتصاد بقى زي الفل ولا لسه فيه تحديات؟ وأهم سؤال: الفلوس دي بتروح فين لو الأمور اتعكست؟
في البداية كده هي إيه الأصول بتاعة البنك المركزي دي ؟
ببساطة.. الأصول دي كل الحاجات اللي البنك يمتلكها وتساوي فلوس. يعني بتتكون من الدهب اللي في خزاينه، اللي وصل 599.581 مليار جنيه بنهاية فبراير 2025، والاحتياطي من العملات الأجنبية زي الدولار واليورو، وكمان الأرصدة اللي عنده في البنوك، والمساهمات في شركات ومؤسسات مالية. كل ده بيتشكل في رقم ضخم، وصل النهاردة لـ6.310 تريليون جنيه، بعد ما كان 6.277 تريليون في يناير 2025.
يعني فكر في البنك المركزي زي واحد عنده محفظة كبيرة، جواها فلوس ودهب واستثمارات، وكل ما المحفظة دي تكبر، كل ما يبقى عنده قدرة أكبر يتحكم في السوق ويحمي الاقتصاد من الصدمات.
طب ايه أهمية رتفاع الأصول دي وليه الرقم ده مهم؟
لأن زيادة أصول البنك المركزي بتعني إن عنده حيطة سند قوية يسند بيها الاقتصاد لو حصل أي مشكلة.. تخيل إنك في بيتك وعندك ادخار كويس لو حاجة حصلت زي ارتفاع الأسعار أو نقص الدولار هتقدر تتصرف.. البنك المركزي كده برضو، لما أصوله بتزيد، بيبقى عنده سيولة أكبر يدير بيها سعر الصرف ويضمن إن الجنيه ميترنحش قدام الدولار.
وفقال لبينات رسمية في فبراير 2025، الأصول زادت بـ33 مليار جنيه عن يناير، وده بيظهر في حاجتين: الأولى إن الذهب قيمته كبرت بسبب ارتفاع أسعاره عالميًا والتانية إن الاحتياطي الأجنبي بيتحسن لأن صافي الأصول الأجنبية وصل 12.090 مليار دولار بنهاية فبراير. يعني البنك بقى عنده عضلة مالية أقوى وده بيطمن المستثمرين اللي بيبصوا على قوة الاقتصاد قبل ما يحطوا فلوسهم في مصر.
بس مش كل حاجة وردي.. الالتزامات بتاعة البنك كمان بتزيد، ودي الديون أو المستحقات اللي لازم يدفعها، ووصلت 6.121 تريليون جنيه.. يعني الفرق بين الأصول والالتزامات لسه بيحتاج متابعة عشان نعرف الصورة كاملة.
طب ارتفاع أصول المركزي بيأثر علينا ازاي؟
لو بصينا على الجانب الإيجابي.. زيادة الأصول بتدي البنك قدرة أكبر يتحكم في التضخم وسعر الصرف.. يعني لو الدولار بدأ يعلى في السوق السودا.. البنك يقدر يتدخل ويحقن دولارات يهدي بيها السوق.. كمان الرقم ده بيطمن الشركاء الدوليين زي صندوق النقد ويخليهم يثقوا إن مصر قادرة تواجه أي أزمات.
لكن فيه جانب تاني. لو الاقتصاد لسه بيعاني من التضخم، زي ما احنا شايفين الأسعار بتطلع كل يوم، الارتفاع ده ممكن ميكونش كفاية لوحده. يعني لو البنك مش قادر يحول الأصول دي لسيولة فعالة في السوق.. أو يخفض الفايدة عشان ينشط الاستثمار.. هتبقى مجرد أرقام حلوة على الورق.
طب الأصول دي بترتفع وبتنخفض امتى؟ الأصول بترتفع لما الاحتياطي الأجنبي بيزيد.. زي لما بتيجي استثمارات من برا، أو لما تحويلات المصريين في الخارج بتكتر، أو لما سعر الذهب عالميًا بيطلع. مثلًا، في 2024، الأصول قفزت بسبب صفقة رأس الحكمة اللي جابت دولارات كتير، وكمان ارتفاع أسعار الذهب. كمان، لما البنك بيحقق أرباح من عملياته، زي الـ133 مليار اللي قالوا عليها في فبراير، ده بيزود الأصول."
على الناحية التانية، بتنخفض لما البنك يضطر يبيع دولارات عشان يدعم الجنيه، أو لما التضخم بيضغط والاقتصاد بيحتاج تدخل كبير. في 2022 مثلًا، الأصول اتأثرت جدًا بسبب أزمة الدولار والتضخم العالمي، واضطروا يسحبوا من الاحتياطي. يعني باختصار الأصول دي تقدر تقول زي الموجة في البحر: بتعلى لما الدنيا هادية.. وبتنزل لما العواصف تضرب.
