خطوة جديدة من الحكومة للوصول لحلم تحويل مصر لمركز تجارة عالمي.. شوف اية الحكاية
مصر عندها خطة أنها تكون مركز اقليمي للتجارة وكل فترة بتاخذ خطوة تقربها من الحلم ده.. والمرة دي الحكومة أخذت خطوة مهمة جدا.. ياتري اية هيا الخطوة دي واية اهمية في خطة التحول لمركز اقليمي للتجارة.
الحكومة في الفترة الرئاسية الجديدة حطت خطط لتحويل مصر لمركز اقليمي للتبادل الطاقة والتبادل التجاري، خصوصا أن مصر بتقع في موقع جغرافي مميز جدا بيربط اكبر 3 قارات في العالم مع بعضهم البعض، وبالتالي مصر معاها مفتاح اكبر 3 قارات في العالم، وعندها القدرة علي ربطهم، وده اللي الحكومة شغالة عليه في الوقت الحالي.
وعلشان مصر توصل لحملها بالتحول لمركز اقليمي لتبادل الطاقة، الحكومة بدأت بدري جدا علشان توصل لحلمها وكانت البداية بتطوير البنية التحتية في مصر من طرق وكباري وموانيء، ومطارات خصوصا ان دي الاساسات اللي اي دولة في العالم بتدور عليها علشان تنشيط حركة التجارة عندها.
بعد ما الحكومة عملت ثورة حقيقية علي البنية التحيتة بتاعها، جه الدور علي تطوير الصناعة وتم اسناد ملف الصناعة لواحد من ابناء المؤسسة العسكرية واللي قدر يعمل نقلة كبيرة في وزارة كانت من اهم الوزارات اللي فيها مشاكل كتيرة، والمشاكل دي كانت للاسف السبب الرئيسي في وفاة اعداد من المصريين بشكل يومي وهيا وزارة النقل واللي كانت قبل تولي الرئيس السيسي اسناد ملف النقل للمهندس الفريق كامل الوزير كانت عبارة عن الة بتحط كل يوم ارواح جديدة من المصريين واللي بيروحوا دمهم اما علي الطرقات في حوادث طرق أو في القطارات في حوادث قطارات.
المهندس كامل الوزير اللي عمل نقله نوعية في ملف النقل، بيكرر دولوقتي النقلة دي في ملف الصناعة، والحكومة شكلت لجنة عليا لملف الصناعة برئاسة الدكتور مصطفي مدبولي رئيس مجلس الوزراء وبعضوية اغلب وزارات الحكومة، وهدفها الاساسي في تذليل عقبات وتشغيل المصانع المتوقفة، وكمان تقديم التسهيلات اللازمة لدخول الاستثمارات الأجنبية للسوق المصري وزيادة الصادرات وتقليل الورادات .
طيب اية الخطوة الجديدة اللي الحكومة اخذتها لتحويل مصر لمركز اقليمي لتبادل الطاقة؟.
الحكومة ممثلة في وزارة التخطيط والتنمية الاقتصادية حاليا بيبحثوا مع الوكالة الكورية للتعاون الدولي مشروع إنشاء منصة رقمية للفحص والتتبع لتسهيل التجارة في مصر، وده بهدف دعم وتسهيل حركة التجارة في مصر وتعزيز القدرة التنافسية في التجارة العالمية .
مشروع مصر لأنشاء منصة رقمية للفحص والتتبع هيساعد مصر علي تطوير حركة التجارة من خلال التحول الرقمي زتسريع عمليات الفحص والتخليص الجمركي وتقليل العقبات الإدارية، وهيوفر بيانات دقيقة هتساعد متخذي القرار علي وضع سياسات أكثر كفاءة وفعالية في قطاع التجارة والصناعة، وهيقلل الإجراءات البيروقراطية المعقدة وهيقلل فترات انتظار البضائع في المنافذ الجمركية، وهيخفض التكاليف التشغيلية على الشركات وبالتالي ثقة المستثمرين الأجانب في النظام التجاري المصري هترتفع وهيكون سبب اساسي في تحسين بيئة الأعمال وجذب استثمارات أجنبية للسوق المصري.
