مستقبل التصدير.. فرص واعدة ومليارات الدولارات في الطريق
ليه التصدير هو مستقبل مصر والحكومة شغالة ازاي على الملف الأهم في الاقتصاد المصري.. والأرقام بتقول ايه دلوقتي وازاي التصدير ممكن يغير بوصلة حياة المصريين للأفضل.
كل دول العالم بتصدر وتستورد لكن فيه حاجة اسمها الميزان التجاري وهو الفرق بين الواردات والصادرات وكل ما كانت الدولة بتستورد اكتر كل ما عانت إقتصاديا وكل ما الصادرات كانت أكبر من الواردات كل ما الدولة دي انتعشت اقتصاديا ووفرت حياة كريمة لشعبها وبتوصل لدرجة الرفاهية قي المعيشة كل ما كانت أرقام الصادرات ضخمة وكبيرة زي ما حصل كده في أوروبا وأمريكا واللي وصلت لمستوى متقدم جدا من الرفاهية بسبب زيادة التصدير عندها وطبعا وفرة العملات الأجنبية وقوة العملة الوطنية.
مصر ليها حوالي 10 سنين وهي بتخطط وبتنفذ برنامج طموح جدا لزيادة الصادرات المصرية لكن دا مش هيتحقق غير باكتر من شرط زي تحقيق الاكتفاء الذاتي الاول محليا من المنتجات قبل الاتجاه للتصدير يعني لازم يكون فيه وفرة في المنتجات الاول ودا معناه بردو إن القاعدة الصناعية لازم تكون كبيرة ومتنوعة وكمان لازم تكون جودة المنتجات مطابقة للمواصفات العالمية عشان الشركات تقدر تنافس لأن الأسواق مش بتقبل غير بمنتجات عالية الجودة وكمان السعر بيعتبر عامل مناسب جدا في زيادة الصادرات..
وحاليا قطاع التصدير في مصر بيشهد الحقيقة تحولات إيجابية وملحوظة بالتزامن مع جهود حكومية حثيثة لتنويع الصادرات وزيادة تنافسيتها في الأسواق العالمية ومصر عندها ميزة أنها بتتمتع بموقع استراتيجي متميز وموارد طبيعية وبشرية هائلة هتخليها مركز تصديري إقليمي وعالمي كمان ولأن مصر فيها قطاعات صناعية واعدة وأيدي بشرية مدربة وبنية أساسية الأحدث في العالم لخدمة التجارة وحركة التصدير زي المواني العملاقة واللوجستيات والخطوط التجارية المحورية وقناة السويس وكمان قربها من الأسواق العالمية المهمة زي افريقيا وأوربا.
مصر شغالة حاليا على أهم خطة في تاريخ الصناعة المصرية وهي توطين العلامات التجارية العملاقة في العالم في كل المجالات من اول صناعة الموبايلات لغاية صناعة السيارات وشفنا إزاي شركات عالمية كتير نقلت أو عملت مصانع ليها في مصر عشان تستفيد من قربها للأسواق ومن البنية الأساسية الحديثة.. وكمان مصر عندها صناعات ناجحة جدا عالميا زي قطاع الصناعات الهندسية والإلكترونية واللي بيشهد نمو متسارع ومدفوع بالاستثمارات في البنية التحتية والتكنولوجيا ومصر بتستهدف زيادة صادرات القطاع دا لتصل إلى 7 مليار دولار في 2025 وكمان مصر متفوقة في الصناعات الغذائية وبتحظى بميزة تنافسية في تصدير المنتجات الزراعية والغذائية المصنعة وعندنا كمان الصناعات النسيجية واللي بتشهد تطور ملحوظ ومصر حققت ارقام صادرات كبيرة في المنسوجات وعندنا كمان قطاع مواد البناء زي الحديد والأسمنت والبويات وغيرها من المنتجات.
الحكومة بتخطط للوصول بالصادرات المصرية الي 145 مليار دولار في 2030 وكل الأرقام الحالية بتقول إن مصر بتحقق اكبر بكتير من الرقم دا في نفس المعاد ودا اكيد معناه زيادة في الموارد الدولارية وكمان انتعاش أكثر في الاقتصاد المصري بشكل عام وتوفير فرص عمل أكتر من خلال بناء مصانع جديدة.
