علشان تحقق أكبر مكاسب.. نصايح مهمة لو ناوي تستثمر فلوسك في الدهب
يا ترى لو ناوي تستثمر فلوسك في الدهب تبدأ منين وتضخ كام بالظبط في أول مرة، وإيه هو أفضل وقت عشان تكسب فيه، هل وقت ارتفاع الأسعار ولا وقت نزولها، وإزاي تعمل ضربة معلم وتبدأ رحلتك في عالم الثراء..
طبعا كلنا عارفين إن الدهب هو عنصر جذب للاستثمار، خاصة في أوقات عدم الاستقرار أو عدم اليقين الاقتصادي، يعني الوقت اللي بتحصل فيه نزاعات وأزمات سياسية وجيوسياسية واقتصادية زي دلوقتي.
والأوقات دي بيلجأ فيها المستثمرين لشراء الدهب عشان يتحوطوا بيه، خاصة لما يحسوا بالحيرة تجاه الأوضاع الاقتصادية، وده طبعا لأن الدهب هو الملاذ الآمن للاستثمار عبر التاريخ، ومخزن بيحفظ قيمة فلوسك.
ولو حضرتك ناوي تستثمر فلوسك في الدهب، فهنقولك شوية نصايح لازم تاخدها في الاعتبار عشان تضمن استثمار آمن وفعال في المعدن النفيس.
أول النصايح دي هي عدم شراء الدهب بكل الفلوس اللي معاك، يعني اشتري بمبلغ وعين مبلغ تاني معاك.
كمان، لما تيجي تشتري دهب لازم يكون من الاحتياطي الرأسمالي، يعني مش من أصل رأس المال بتاعك، وده معناه بالفلوس الفايضة معاك .
أما بقى الحد الأقصى لشراء الدهب، فلازم يكون 50% من الاحتياطي الخاص بيك، عشان يكون في سيولة وفلوس تانية تقدر تستثمرها في قطاعات تانية زي العقارات مثلا.
رابع حاجة، لازم تحط خطة زمنية لاقتناء الدهب، يعني مثلا ممكن تشتري 2 جرام كل شهر، وابعد عن عن شراء المشغولات لو اذا ناوي تستثمر فلوسك وده بسبب أجرة صناعتها يعني المصنعية اللي بتتحصم لما تيجي تبيع.
لكن، لو عايز تشتري مشغولات تستخدمها في الزينة أو الادخار، فلازم تعرف بعض النقط المهمة، زي أسعار جرامات الذهب (18 - 21 - 24)، وأسعار المصنعية وكمان سعر ضريبة السلع والخدمات.
ويفضل شراء العملات الذهبية أو السبائك، مش المشغولات، وياريت تبعد عن انك تشتري من ناس مجهولة، يعني حاول تتعامل مع التجار والوكلاء والشركات أصحاب السمعة الكويسة، وتتأكد من وجود وصحة شهادة المواصفات المرفقة بالسبيكة عند الشراء عشان تتجنب انك تتعرض للغش أو التزوير.
برضو، لازم تكون السبايك بأحجام صغيرة عشان لو اضطىيت تبيع، تعرف تبيع الحجم الصغير.
ضيف على كل ده، أنك لازم تراقب دايما السوق عشان تستغل الفرص وتشتري في حال انخفاض السعر.
وأخيرا، طول فترة الاستثمار، لأن محاولة توظيف مبلغ المدخرات في استثمارات الدهب بتحتاج لوقت طويل نسبيًا عشان تعرف تحقق عائد كويس ومحترم.
