مورد دولاري غير متوقع.. إزاي مشروعات الإسكان هتوفر عملة صعبة للبلد؟
قطاع التنمية العمرانية واحد من أهم الملفات الاستثمارية اللي الحكومة شغالة عليها في الوقت الحالي.. ياتري الحكومة بتدير ملف الاستثمارات في قطاع البناء والتشييد أزاي... والحكومة مستهدفة توصل بإيرادات اد ايه منه.
قطاع التنمية العقارية والعمرانية واحد من اهم الملفات اللي بتحتل صدراه اهتمام الحكومة المصرية خصوصا أن قطاع عليه اقبال كبير جدا سواء في السوق المحلي أو السوق الدولي وده اللي اثبتته التجارب اللي فاتت لما الحكومة أعلنت عن أكثر من مشروع من مشاريع الإسكان المختلفة سواء كان اسكان فاخر أو متوسط أو حتي إسكان إجتماعي، ده غير الخطة اللي الدولة بدأت تعتمد عليها لزيادة الإيرادات الدولارية من خلال برنامج تصدير العقار.
طيب الدولة بتدير قطاع الإسكان والدولة مستهدفة منه إية؟.
قطاع التنمية العمرانية والعقارية في مصر قايم علي شقين الأول منهم هو الإعلان المخصصة لخدمة المواطنين المصريين وده الحكومة عملت فيه شغل كبير جدا واعلنت عن أكثر من مشروع سكني سواء كانت اعلانات للاسكان الفاخر في مشروعات سكن وجنة ودار مصر والمخصصين للاسكان الفاخر، أو مشروعات الإسكان المتوسط واخيرا الإسكان الإجتماعي واللي الدولة بداته بإعلان مشروع سكن لكل المصريين 5 واللي تضمن الإعلان عن توفير اكثر من 72 الف شقة سكنية للمواطنين، منهم اللي هيتم تسليمه بشكل فوري ومنهم اللي هيتم تسليمه خلال 5 سنين، وده بهدف حل أزمة الإسكان في مصر خصوصا أن السوق المصري بيعاني من فقاعة عقارية كبيرة وانخفاض في الإقبال علي الشراء بسبب ارتفاع اسعارها بارقام كبيرة أعلي من سعرها الحقيقي.
الشق الثاني من برامج التنمية العقارية والعمرانية وده في جزء منهم مخصص لخدمة المصريين العاملين بالخارج، واللي الدولة في الوقت الحالي بتستهدف زيادة ربهم بوطنهم مصر، وفعلا الحكومة أعلنت عن اطلاق مبادرة بيتك في مصر، ودي مخصصة للمصريين العاملين بالخارج واللي بتتضمن طرح عدد كبير من الأراضي والشقق السكنية الفاخرة والفيلات وهتكون اسعارها بالدولار وهتختلف من مدينة للتانية وبيوصل سعر المتر في أبراج العلمين الجديدة لـ 3750 دولار، وفي الحي اللاتيني بالعلمين الجديدة بيوصل سعر المتر لـ 1045 دولار، وفي الحي الثالث بالعاصمة الإدارية الجديدة بيوصل سعر المتر لـ425 دولار، وفي الحي الخامس بالعاصمة الإدارية برضوا بيوصل سعر المتر لـ750 دولار، وبيوصل سعر المتر في مشروع صبا بمدينة 6 أكتوبر لـ 375 دولار، وفي مدينة الشيخ زايد بيوصل سعر المتر لـ 1145 دولار.
اما بقي للفئات من غير المصريين بالدولة عملت له حاجة اسمها تصدير العقارات، ودي بتكون اسعارها بالدولار ودي بتدي الفرصة لغير المصريين من الأجانب والعرب لشراء الوحدات السكنية بطرق مختلفة وغير تقليدية، وده واحدة من المبادرات اللي اطلقتها الحكومة لتعزيز مواردها من العملة الصعبة والاستقادة من الراغبة الكبيرة لعدد كبير من غير المصريين في امتلاك عقارات بمصر.
