الصين هتنقل مصر في حتة تانية خالص.. إيه اللي بيحصل في اقتصادية قناة السويس؟
هو إيه اللي ممكن يحصل لو الصين حولت المنطقة الاقتصادية لقناة السويس لمنصة تصدير للعالم؟ تخيلوا مليارات الدولارات تدخل مصر والاقتصاد يقفز خطوة كبيرة لقدام.. طب الصين بتستثمر في إيه هناك؟ و30 شركة صينية جديدة بتفكر تجيب 3 مليار دولار ده هيعمل إيه في السوق؟
الصين فى الفترة الأخيرة دلوقتي عينها على مصر وبشكل خاص المنطقة الاقتصادية لقناة السويس. .الفكرة إنها عايزة تحول المنطقة دي لمركز تصدير عالمي.. يعني البضايع تتصنع هنا وتطلع على أوروبا وأمريكا وكل حتة في العالم.. ده مش كلام في الهوا فيه من 20 لـ30 شركة صينية بتدرس التوسع في مصر خلال 2025.. ودول بيفكروا يجيبوا استثمارات بين 2 لـ3 مليار دولار.. يعني إحنا بنتكلم عن فلوس كبيرة ممكن تغير المعادلة.
طب الصين بتستثمر في إيه؟
الشركات الصينية مركزة على قطاعات زي الملابس الجاهزة والمنسوجات والأجهزة المنزلية بالإضافة للصناعات التكنولوجية زي الهواتف الذكية.. دي حاجات مطلوبة جدًا في السوق العالمي.. ومصر بموقعها وإمكانياتها بقت المكان المثالي للتصنيع.. المنطقة الاقتصادية لقناة السويس هي الهدف الأساسي لأنها قريبة من الموانئ وفيها تسهيلات كبيرة للتصدير.. تقريبًا تلتين الاستثمارات الصينية الجديدة هتروح هناك والباقي هيتوزع على المناطق الصناعية الداخلية.
طب ليه الصين مهتمة كده دلوقتي؟
السبب بسيط.. الحرب التجارية مع أمريكا وأوروبا والرسوم الجمركية اللي بتضرب على البضايع الصينية خلت الشركات تدور على مكان تاني تصنع فيه وتصدر منه.. مصر هنا بقت الحل الأمثل لأن عندنا اتفاقيات تجارة حرة مع أمريكا وأوروبا يعني البضايع اللي تتصنع هنا تدخل الأسواق دي من غير جمارك.. كمان مصر فيها عمالة تكلفتها منخفضة.. وسوق محلي كبير أكتر من 100 مليون نسمة ده غير إنها بتصل بأسواق فيها 3.5 مليار مستهلك حول العالم.
طب الاستثمارات الصينية دي هتعمل إيه في الاقتصاد؟
أول حاجة.. هتجيب دولارات كتير.. لو 30 شركة جابوا 3 مليار دولار زي المتوقع.. ده هيزود الاحتياطي النقدي ويخفف الضغط على الدولار.. تاني حاجة هتوفر شغل للناس.. الصناعات زي المنسوجات والتكنولوجيا محتاجة عمالة كبيرة.. وده معناه آلاف الوظايف للمصريين.. تالت حاجة هتزود الصادرات.. لما المنتجات تتصنع هنا وتتصدر للعالم.. إيرادات مصر بالعملة الصعبة هتطلع.. وده هيدعم الجنيه ويقلل الاعتماد على الاستيراد.
وخد بالك العلاقات مع الصين مش جديدة، من زمان فيها 3 محاور: تجارة، مقاولات، واستثمار.. والصين أكبر مصدر لمصر في 2024 استوردنا منها بضايع بـ19.7% من إجمالي الواردات غير النفطية، يعني حوالي 15.5 مليار دولار. كمان بتعمل مشاريع كبيرة زي الطرق والمزارع السمكية.
. لكن الاستثمار كان أضعف محور.. ودلوقتي بقى بينشط جدًا.. والصين عايزة تنقل الصناعات الصغيرة والمتوسطة لمصر عشان تركز هي على التكنولوجيا المتقدمة ومصر هتستفيد من الخبرة والفلوس.
وفيه دلوقتي 2066 شركة صينية في مصر باستثمارات أكتر من 8 مليار دولار لكن اللي جاي أكبر.. الشركات الجديدة اللي بتفكر تيجي هتركز على المناطق الحرة.. خصوصًا في السويس لأنها بتوفر تكاليف أقل وسرعة في التصدير.. وده هيخلي المنطقة الاقتصادية لقناة السويس مركز عالمي فعلاً مش مجرد منطقة صناعية عادية.
طب إيه المكسب لمصر؟
غير الفلوس والشغل.. الاستثمارات دي هتخلينا ننافس عالميًا. بدل ما نبقى مجرد سوق مستهلك.. هنبقى بلد مصنع ومصدر.. كمان الصين هتساعدنا نطور الصناعات التكنولوجية.. وده هيرفع قيمة المنتجات بتاعتنا.. ولو الخطة دي نجحت المنطقة الاقتصادية ممكن تجيب مليارات الدولارات كل سنة وتحسن ميزان المدفوعات اللي دايمًا بنعاني فيه.
