لوبي اقتصادي مصري.. حكاية العملاق الجديد في المنطقة
هي ايه حكايه اللوبي الاقتصادي المصري الجديد وليه متوقع يكون قوة كبيرة وعملاق مالي واقتصادي في المنطقة كلها وازاي هيكون مصدر جديد لملياراات الدولارات سنويا.
في الكام الساعه اللي فاتت قرينا خبر مهم جدا بس محدش خد باله من أهميته وهو اتفاق 41 شركة خاصة مصرية على تأسيس شركة مساهمة جديدة هدفها الأول هو التوسع في الدول العربية والمشاركة في عمليات إعادة الإعمار في دول كتير بالمنطقة وكشف كمان في تصريحات خاصة على هامش اجتماع لجنة التعاون العربي في اتحاد الصناعات المصرية إن إجراءات تأسيس الكيان الجديد هتم الأسبوع الجاي وهيحمل اسم "التحالف العربي للاستثمار الصناعي" ودا بقي اسم الكيان الاقتصادي المصري الجديد..
حسب المعلومات المتاحة الشركة الجديدة هدفها زيادة الصادرات المصرية إلى الدول العربية، والترويج للمنتجات المحلية والبداية هتكون من ليبيا وهيتم فتح مكاتب في اكتر من دولة زي العراق والإمارات..
طيب ايه الحكاية بالظبط والكيان دا هيعمل ايه بالظبط وايه علاقته بملف الصادرات ؟
شوف ياسيدي زي ما قلنا كده الكيان الجديد د عبارة عن تحالف لعشرات الشركات المصرية الضخمة في مجالات كتير بداية من العقار لغاية شركات الادوات الصحية والكهربائية والمواسير والكيان الجديد دا هيكون بديل للمستثمرين ونيابة عنهم وهتتولى تنفيذ الأعمال سواء الترويج أو الإنشاءات وحتى التعامل مع الجهات الحكومية وأنها هتضم ممثلين من القطاع الخاص فقط وزي ما احنا عارفين مصر واجهت أزمة اقتصادية خانقة في السنتين اللي فات دو أثرت على توافر الدولار في الأسواق ودا ضغط على الشركات المحلية واللي قررت تتوجه للتوسع في الأسواق الخارجية وخاصة الخليج والعراق وليبيا ورب ضارة نافعة زي ما بيقول المصريين لأن دا فتح فرص ضخمة قدام الشركات المصرية للتوسع وتنويع مواردها وزيادة اعمالها سواء في مصر أو الخارج وبقي عندها سيولة كبيرة جدا وشفنا حجم مشروعات مجموعة طلعت مصطفى في الخليج وصلت لقد إيه.
وفي نفس الوقت التحالفا هيضمن يسوق للمنتج المصري في المشروعات الجديدة في الخارج يعني لو بينفذ مشروع سكني مثلا في ليبيا أو العراق أو السودان فهتكون الأولوية للمنتج المصري بداية من الحديد والأسمنت لغاية الاسلام والبويات والأخشاب والأدوات الصحية والكهربائية وغيرها ودا هيضمن تسويق ونفاذ للمنتجات المصرية بشكل أكبر في الأسواق دي وهيسهل عملية الوصول إلى 145 مليار دولار صادرات في 2030.
كمان التحالف الجديد دا من الشركات المصرية الخاصة قدامه فرص بمليارات الدولارات في قطاع إعادة الإعمار في اكتر من بلد زي العراق وليبيا ولبنان وغزة ودا لأن الشركات المصرية مؤهلة لدا وعندها شركات ضخمة ومستوى عالمي في الخبرة والأداء وشفنا فعلا أداء وسمعة الشركات المصرية في إعادة إعمار ليبيا والعراق وكمان في افريقيا وشفنا قد ايه نالت التقدير والاحترام لدرجة أن فيه شركات مصرية بتاخد مشروعات بالأمر المباشر في دول افريقية بسبب سابقة الأعمال المشرفة والجودة العالية في تنفيذ المشروعات.
