توقعات أسعار الذهب في 2025.. هل ممكن يحصل انخفاض مفاجئ؟
هو إيه اللي بيحصل لأسعار الذهب، شوية فوق وشوية تحت، ومع بداية سنة 2025 المعدن الأصفر حقق أكبر مكاسب له في التاريخ، هل يا ترى هيفضل يحقق مكاسب في الشهور الجاية ولا ممكن يحصل تراجع أو انخفاض في الأسعار؟
طبعا كلنا متابعين الصحوة اللى عملها الدهب في الفترة الأخيرة، لأن الأسعار ارتفعت العالمية واتأثرت بيها الأسعار المحلية في كل دول العالم ومن بينها مصر، عشان كلنا نتأكد إن الدهب هو الحصان الرابح في 2025.
وبالنسبة لتوقعات أسعار الدهب العالمية السنة دي، فأغلبها بيرجح أن سعر الوقية يتخطى مستوى 3000 دولار، وده أعلى قمة تاريخية للدهب، وده مش كلامنا دي توقعات كبرى بنوك الاستثمار وأهمها جولدمان ساكس.
أما بنك الاستثمار العالمي، فتوقع استمرار نفس الظروف اللي قادت سعر أوقية الدهب في 2024 للارتفاع الكبير في 2025، وده بسبب توجه البنوك المركزية العالمية وأهمها الاحتياطي الفيدرالي لتخفيض أسعار الفايدة، وبالتالي ساهم القرار ده في رفع أسهم الدهب وارتفاع أسعاره.
عشان كده، أغلب التوقعات رايحة على إن سعر الأونصة يوصل ل 3 آلاف دولار مع منتصف 2025، طالما الظروف العالمية ماتغيرتش، ومع استمرار المخاوف اللي بتدفع المستثمرين للتحوط بالدهب كملاذ آمن ضد الأزمات الاقتصادية أو الجيو سياسية.
ولو ماتعرفش، فكل الاحتمالات والتوقعات اللي قولناها بتستند لأسباب معينة، وهي استمرار التوترات الجيوسياسية والأوضاع الاقتصادية العالمية، وأهمها الحرب التجارية بين الولايات المتحدة والصين، ولكن لو انتهت الظروف دي ممكن يتوقف الارتفاع الجنوني للدهب والأسعار تنزل بشكل كبير.
أما لو رجعنا لورا شوية صغيرين، وتحديدا مع تنصيب "ترامب" رسميا رئيسا لأمريكا، فكان وقتها سعر أوقية الذهب بدأت في الصعود، عشان يسجل المعدن الأصفر قمم تاريخية جديدة لحد ماتخطى مستوى 2910 دولارات دلوقتي، ومتوقع يوصل ل 3 آلاف دولار في الشهور الجاية.
أما بالنسبة لمصر، فطبعا الظروف والأحداث الاقتصادية العالمية بيتأثر بيها السوق المصري زي أي سوق في العالم، عشان كده ارتفعت أسعار الدهب في ال 3 شهور الأخيرة، وسجل جرام 21 مستوى تاريخي بواقع 4100 جنيه، ومتوقع مع منتصف 2025 إنه يوصل ل 4500 جنيه تأثرا بارتفاع الأسعار العالمية للمعدن النفيس.
وفي النهاية، كل التوقعات رايحة على ارتفاع الدهب في الفترة الجاية، فلو معاك دهب حاول تحافظ عليه، ولو محتاج فلوس فاستغل فرصة أالزيادة وبيع بأعلى مكسب.
