13 حقل جديد وعوايد بمليارات الدولارات.. الحكومة ناوية على إيه في ملف الاكتشافات البترولية
يا ترى إيه سر طرح الحكومة ممثلة في وزارة البترول لـ13 حقل بترولي جديد للاستثمار في منطقة البحر المتوسط والصحراء الغربية، هل الحقول دي هتقدر تجذب المستثمرين عشان يحولوها لكنوز طبيعية تقدر تخرج لهم أرباح بالملايين وفي نفس الوقت تفيد الدولة، ولا الوزارة عايزة توسع دايرة الاستكشاف في المناطق دي وبترمي الطعم للجميع عشان تزود القدرة الإنتاجية من وسائل الطاقة..
في الأيام الأخيرة، وزارة البترول والثروة المعدنية أعلنت عن طرح فرص استثمارية جديدة لـ7 حقول غير منماة في البحر المتوسط، و6 من المناطق الاستكشافية بخليج السويس والصحراء الغربية، والإعلان ده كان على بوابة مصر للاستكشاف والإنتاج (EUG)، وبيعتبر فرصة ذهبية للمستثمرين في الزيت والغاز والبترول وخلافه.
ونقدر نقول، إن الطرح الأخير ده بيجي ضمن جهود وزارة البترول عشان تزود الإنتاج من الزيت الخام والغاز، عشان كمان يتم فتح التزايد عليها لمدة شهرين وهيكون موعد الإغلاق 4 مايو 2025.
ووزارة البترول قدرت في الفترة الأخيرة، تجذب استثمارات جديدة في مجال البحث والاستكشاف والإنتاج، وفتحت باب التزايد على 13 منطقة استكشافية وحقول متقادمة، وبالفعل تم استلام العروض المتعلقة بالفرص دي، وحاليًا بيتم تقييم العروض لها باستثمارات متوقعة تتجاوز 700 مليون دولار وهتتضاعف في حالة تحقيق كشف تجاري جديد.
كمان، الوزارة بتسعى لتعزيز الإنتاج من الغاز الطبيعي في البحر المتوسط، وده بيحصل من خلال طرح 7 اكتشافات غير منماة، وتم تقسيم الاكتشافات لمجموعتين عشان تضمن تسريع عمليات الإنتاج وتعظيم العوائد الاقتصادية.
والمجموعة الأولى، هي حقول «أتين» و«ميريت» و«رحمات»، أما المجموعة الثانية فبتضم حقول «نوتس» و«سلامات» و«ساتيس» و«سالمون»، والاكتشافات دي بتمثل فرص استثمارية مهمة لزيادة إنتاج الغاز لمواكبة الطلب المتزايد عليه.
كمان، دي بتعتبر المرة الأولى اللي بيتم فيها طرح عدد من الاكتشافات غير المنماة بنظام المجموعات، من خلال الخريطة الاستثمارية المفتوحة ببوابة مصر للاستكشاف والإنتاج، وهي آلية مبتكرة هدفها تحسين العائد على الاستثمار وتقليل تكاليف الإنتاج، وتسهيل وتسريع عملية التنمية والإنتاج.
وبجانب الفرص المطروحة في البحر المتوسط، الوزارة كمان طرحت 6 مناطق استكشافية في الصحراء الغربية وخليج السويس، واللي بتعتبر هي كمان فرص واعدة في مجال الاستكشاف، وبتشمل 3 مناطق بالصحراء الغربية وهي «شمال شرق بئر النص» و«جنوب الفيوم» و«وادي صنور»، و3 مناطق في خليج السويس وهي «شرق جيسوم» و«شرق جبل الزيت» و«شرق شدوان»، وكل ده بيفتح آفاق أكبر لتوسيع إنتاج البترول والغاز وتعزيز الأثر الإيجابي على الاقتصاد الوطني.
